Қызылордалық теміржолшыларға наградалар табыс етілді

Әнұранмен ашылған жиында «Қызылорда ЖТ бөлімшесі» филиалының бастығы Батырхан Базарбаев пен Магистральдық желі бөлімшесі директорының орынбасары Ербол Оңғарбаев аймақ теміржолын дамытып, саланың өркендеуіне үлес қосып жүрген теміржолшыларды мерекемен құттықтады.  

Аймақ теміржолының басшысы мерекеге орай арнайы сыйақы берілетінін жеткізіп, көпшілікті қуантты. Сонымен қатар Компанияның Басқарма төрағасы Н.Сауранбаевтың бұйрығымен түрлі марапатқа ие болған теміржолшыларға наградаларын табыс етті. Тасымалды ұйымдастыру және талаптар бөлімінің жетекші инженері Алтынгүл Шигенова «Кәсібі бойынша үздік» атанса, «Үздік маман» белгісі заң бөлімінің басшысы Дархан Айқожаевқа, Магистральдық желі бөлімшесі қаржыландыру бөлімінің менеджері Нұргүл Еңсеповаға берілді. Құрмет грамотасымен Қамыстыбас станциясының кезекшісі Күлшара Асанбаева, Қызылорда станциясының орталықтандыру постының операторы Оразкүл Айжарқынова, Қызылорда қалпына келтіру пойызының бульдозер машинисі Владимир Зайцев, жетекші бухгалтер Елена Селина марапатталды.  

Компания басшылығының марапатымен қатар қос бөлімше басшылығы, кәсіподақ ұйымы атынан елу шақты сала қызметкері арнайы марапат алды.  

– Ел егемендігінің тарихи бастауы Республика күнімен аймақ теміржолында тер төгіп, тәуелсіздігіміздің нығаюына сүбелі үлес қосып жүрген барша теміржолшыларды Сала кәсіподағы атынан құттықтаймын. Станция-бекеттерде жұмыс істейтін үздіктерімізге де марапат пен арнайы сыйлықтар бар, – деді кәсіподақ ұйымының төрағасы Мұхтар Көпірбаев.  

Бұл күні бөлімшеге қарасты бірқатар мекемелерде де салтанатты жиын өткізілді. Нұртай Байғазы басқаратын Қызылорда локомотив пайдалану депосында және Асылбек Ияров басқаратын Сексеуіл локомотив пайдалану депосында өткен жиындарға кент әкімдері де қатысып, теміржолшыларға құрмет көрсетілді. Ал Аман Кубенов басқаратын Қызылорда белгі беру және байланыс дистанциясында спорттық жарыстардан сайыс өткізіліп, жеңімпаздар марапат төріне шығарылды.