Атырау вокзалында жолаушыларға ерекше тосынсый көрсетілді
Атырау облысы бойынша меншікті тілші
Республика күні қарсаңында Атырау вокзалында жолаушыларды ерекше тосынсый қарсы алды. Атырау жүк тасымалы және магистральдық желі бөлімшелері, «Қазтеміртранс» АҚ Атырау филиалы кәсіподақ ұйымдары бірлесіп өткізген акция көптің көңілін көтеріп, мерекелік көңіл-күй сыйлады.
Вокзал перронында қаз-қатар тізілген үстелдер түрлі ұлттық дәмге толы болды. Бірінші жолда тұрған №691 «Атырау-Ақтөбе» пойызына асыққан жолаушы халыққа ыстық бәліш, тәтті тоқаш, басқа да тәтті дәмдер ұсынылып, сыртында «Қазкөліккәсіп, 25 қазан – Республика күні» деп жазылған кішкене қорап таратылды. Оның ішіне құрт пен жент, бауырсақ, құрма, «Қазақстан» шоколады салынған екен.
Пойызға асыққан жолаушылар дәмнен ауыз тиіп, сый қораптарын алып, бірін-бірі мерекемен құттықтап аттануда. Олардың арасында қарттар мен жастар, Атырауға жарысқа келген баскетболдан ұлттық құрама ойыншылары, Отан алдындағы борышын өтеп, үйлеріне қайтып бара жатқан солдаттар, т.б. бар. Жолсеріктер де құралақан қалмады, оларға да, вагонда отырған жолаушыларға да кәсіподақ қызметкерлері аралап жүріп дәмнен үлестірді. Вокзал кассасының бастығы Ажар Ахметованың айтуынша, аталған пойыз вагондарына 420 жолаушы міну керек болса, соның 80 пайызына билет сатылыпты.
Перронда «Атамекен», «Менің Қазақстаным», басқа да ұлттық патриотты әндер ойнатылып, Атырау станциясының бастығы Алтай Көбегенов, кәсіподақ төрағасы Боранбай Қамиев жолаушыларды дауыс зорайтқыш арқылы Республика күнімен құттықтап, сәт-сапар тіледі.