Локомотив шаруашылығында өртке қарсы шаралар күшейтілді

Биыл Семей ЖТ бөлімшесінде локомотив шаруашылығын тексеру, қадағалау шаралары күшейтіле түсті. Бұл бағытта атқарылған жұмыстар күзгі комиссиялық бақылау кезінде қорытындыланып, нақты шешімдер қабылданды.

Әуелгі кезектегі қолға алынған мәселе тепловоздардың өрт қауіпсіздігі бойынша сақтықты күшейту болып отыр. Бұл ретте әсіресе қолданыста ұзағырақ жүрген локомотивтердің жүріс кезінде ұшқын шығару қауіптілігі көп болып отыр. Сол себепті арнайы комиссия тиянақты тексеру жұмыстарын жүргізіп, тепловоздардан «кіші айналым» кезінде ешқандай кінәрат анықталған жоқ. Ұшқынөшіргіш құрылғы қалыпты жұмыс істеп тұр. Алайда, «үлкен айналымға» өткен ескі тепловоздардың желі бойында ұшқын шығармауына толық кепілдік жоқ. Сондықтан да бірқатар локомотивтердің жанармай жүйесі тексеріліп, үш тепловоздың ұшқынөшіргіш құрылғысы ауыстырылған.  

Сонымен қатар, барлық локомотив деполарында қадағалау шаралары күшейтілді. Локомотив бригадаларын күнделікті желіге шығар алдында арнайы бектілген инспекторлар тексеріп шығады. Бұл шаралар желі бойындағы ұшқыннан өрт тұтану қаупінің алдын алады. Мысалы, биылғы жаз мезгілінде ел шығысында орман өрттері тіркеліп, теміржол құрылымдарына да елеулі түрде қауіп төндірген болатын. Сол себепті желі бойындағы өрт қаупіне әкелуі мүмкін барлық жағдаяттар толық қадағалануда. Анықталғандай, қазан айының 1-не дейінгі аралықта өрт қауіптілігіне байланысты 58 кемшілік анықталған. Әйтсе де, бұл өткен жылдың есепті мерзімімен салыстырғада 77 көрсеткішке аз саналады. Яғни теміржолшылар жазғы өрт оқиғаларынан сабақ алып, қауіпсіздік шараларын тым күшейткен болып отыр.  

Локомотив шаруашылығындағы өрттің алдын алу жұмыстары осылайша қатаң қадағалауға алынып отыр. Жалпы, локомотив шаруашалығы бойынша күзгі комиссиялық байқау кезінде тек Семей өңірі бойынша 90 кемшілік анықталып, 6 тыйым салу шарасы қабылданыпты.