Студенттер рельсті дайындау процесімен танысты
Ақтөбе облысы бойынша меншікті тілші
Ақтөбе өнеркәсіптік технологиялар және басқару колледжінің студенттері өңірдегі рельс-арқалық зауытының өндіріс алаңына барып, теміржол рельстерін дайындау процесін көзбен көрді.
Зауыт аумағына кіргеннен арнайы киіммен қамтамасыз етілген студенттер қауіпсіздік техникасы бойынша нұсқамадан өтті. Содан кейін ғана цехтарды аралап, онда жұмыс істеп жатқан жұмысшылармен тілдесуге мүмкіндік алды.
2016 жылы іске қосылған Ақтөбе рельс-арқалық зауытының бүгінгі өндірістік қуаты, экспорттық мүмкіндіктері туралы студенттерге зауыт өкілі жан-жақты мағлұмат беріп, оқу бітірген соң отандық өндірісте еңбек етуге шақырды.
Студенттер әсіресе АРБЗ-ның «визит карточкасы» ретінде танылған жоғары жылдамдықты магистральдарда қолданылатын ДТ350 санатты ұзын өлшемді рельстердің дайындалу технологиясына қызығушылық танытып, сауалдарына жауап алды.
Айта кетейік, 2022 жылы «Ақтөбе рельс-арқалық зауыты» ЖШС мен «Ақтөбе өнеркәсіптік технологиялар және басқару колледжі» МКҚК арасында Кәсіпорынды білікті мамандармен қамтамасыз етуде және оның кадрлық әлеуетін арттыруда, сондай-ақ оқу орындарының кәсіптік бағдарлау жұмысын ұйымдастыруда тікелей және өзара тиімді ынтымақтастық орнату мақсатында меморандум жасалған.
