Қарашада туған теміржолшылар

Қызылорда магистральдық желі бөлімшесінде кәсіподақ ұйымының ұйытқы болуымен әр айда туған заматтарды құттықтау үрдісі қалыптасқан. Кезек қарашада туғандарға келіпті.

Бұл үрдіс кәсіподақ ұйымы белсенділерінің әріптеске деген құрмет пен оның жеке қуанышын бөлісіп, қөтеріңкі көңіл-күй сыйлау ниетінен туған. Әр айдың басында мекемелердің кіреберісіндегі тақтада «осы айда дүниеге келгендер» айдарымен плакаттар ілініп, әріптестерінің туған күнінен көпшілік алдын ала хабардар болады.  

Міне, бүгін қарашада туған 11 теміржолшы туған күнімен құттықтап, әріптестері құрметке бөледі.  

– Туған күн иесінің мерейлі жасқа келуі шарт емес, ағымдағы ай ішінде туған әріптестерімізді топтап айдың бір күні бастарын қосып, құттықтау рәсімін өткіземіз. Бүгін міне 11 әріптесімізді құттықтап, жақсы тілекпен жан жылуына бөлеп, арнайы дайындаған сый-сияпатымызды табыстап қуанттық, – дейді бөлімшенің персонал жөніндегі менеджері Салтанат Махмутова.  

Қарашада туғандар қатарында бөлімшенің экология бөлімінің инженері Ұлжалғас Арқабаева, материалдық-техникалық қамту бөлімінің инженерлері Еркебұлан Сүлейменов, Мақсат Төлепбергенов пен Бекзат Файызов бар екен.