Айман апаға алғыс айтты
Атырау облысы бойынша меншікті тілші
Құлсары станциясының аға жүк қабылдап-жөнелтушісі Жұмағали Айман Дүйсешқызы теміржолда табаны күректей қырық жыл еңбек етіп, 1 желтоқсаннан бастап зейнетке шықты.
Суреті Құрмет тақтасына ілінген, «Адал еңбегі үшін» төсбелгісімен марапатталған майталман маманға алғыс айтып, құрметке бөлеген ұжымдастары «бейнетіңіздің зейнетін көріңіз» деген тілекпен шығарып салды.
Гурьев ауыл шаруашылық техникумының есеп бөлімін бітіріп, бухгалтер мамандығын алған Айман апа еңбек жолын 1984 жылы жүк қабылдаушыдан бастап, Құлсары станциясында жүк кассирі, кейін жүк және багажды қабылдап-тапсырушы болып жалғастырады.
«Айман Дүйсешқызы Теңіз станциясында жүк түсіру-тиеу жұмыстарын жүргізетін контрагенттермен және Құлсары станциясының темір жолы арқылы келіп жатқан жүктердің түсіру-тиеу жұмыстарымен айналысатын мекемелермен тығыз байланыста жұмыс істеді. Ауысымда 11 сағаттан еңбек етіп, күкірт, мұнай, пропан-бутан жүктері тиелген 7-8 составтан тұратын 700-800 вагонның сапасын тексеріп шығу өте жауапты жұмыс» дейді әріптестері. Сондай-ақ ол ұжымда беделді, сауатты маман ретінде жастардың ақылшы ұстазы да бола білді. Жолдасы Аманбаев Бимырза өмірден өтсе де үш ұлын жалғыз тәрбиелеп жеткізіп, барлығының жоғары білім алуына ықпал етті. Бүгінде үш ұлы да анасының жолын қуып, теміржол саласының мықты мамандары болып қалыптасты.