Теміржолшылар үшін жауапты кезең туды

Теміржолшылар үшін жауапты кезең басталды. Семей магистральдық желі бөлімшесі басшылығы бірінші кезекте қысқы мезгілдегі жұмыстарды ұйымдастыру бойынша тұрмыстық жұмыстарға назар аударуда.

Ең алдымен желі бойындағы жылу қазандықтары қадағаланды. Бұл орайда, автономды түрде жылытуға мүмкіндік беретін үш қазандықтың жұмысы толық күшінде жұмыс істеп тұрғаны нақтыланды. Жазғы мезгілде НЖС-6-ға қарасты мекемелердегі жылу ошақтары ағымдық жөндеуден өткен болатын. Сондықтан болар, желі бойындағы жалпы саны 117 нысандағы бөлме температурасы ойдағыдай. Әзірге теміржолшылар тарапынан ешқандай шағым тіркелген жоқ.  

Биылғы алғашқы аяздың өзі жергілікті сала қызметкерлерін алғашқы сынақтан өткізді десек болады. Қазіргі таңда барлық мекемелердің көмір қоры мен техникалық қажеттілік үшін алынған дизельді жанармай да жеткілікті. Айта кетерлігі сол, тексеру шаралары әсіресе жол қозғалысына тікелей жауапты ПЧ-42, ПЧ-40 және ПЧ-39 мекемелері бойынша біршама күшейтілген түрде жүргізілуде. Бұл ретте бағыттамаларға арналған бес пневмоүрлегіш пен жолшыларға ғана тиесілі 82 бірлік автокөліктің де жай-күйіне назар аударылды.  

Бірінші кезекте жолшылар қызметі қатаң қадағалауға алынуда. Олардың қысқы мезгілдегі қауіпсіздігі басты орында. Сол себепті бөлімше бойынша қысты алғаш өткізіп отырған теміржолшыларды оқыту, үйрету, қысқасы, қысқы мезгілдегі жұмыс ырғағына ілесіп кетулері үшін барлық жағдай жасалуда.  

Десек те, жолшылар жұмысының жайлылығына жаз бойғы даярлық шаралары септігін тигізуде. Мәселен, қос бағытқа қызмет көрсететін Семей жол дистанциясы бойынша барлық 25 жылыну пункті жөндеуден өткізіліп, жаңартылған болатын. Сонымен қатар Дегелең және Шаған станцияларында жолшылар қауымының жылынулары үшін жаңадан екі модуль пайдалануға берілген еді.

– Енді біраз күнде қыс «шілдесіне» де келіп жетеміз. Сол сияқты жыл сайын ұйымдастырылатын «қар сенбіліктерінің» де ауылы алыс емес сияқты. Яғни нағыз сыналар шақ әлі алда. Жолшыларымыздың даярлық деңгейі жоғары дей аламын. Қажетті техника да бар, кез келген тосын жайтқа әзірміз. Ауа райының қандай жағдайында болмасын пойыз қозғалысын үздіксіз қамтамасыз етуге даярмыз, – дейді бұл орайда ПЧ-39 директоры Рахат Ботаспаев.  

Бүгінгі таңда НЖС-6 бөлімшесі бойынша барлық құрылымдар штаттық режимде жұмыс істеп тұр. Жұмыс ырғағы толыққанды бақылауда.