Қандыағаш локомотив пайдалану депосы биыл 14 жаңа тепловозбен толықты
Ақтөбе облысы бойынша меншікті тілші
Биыл Қандыағаш локомотив пайдалану депосы 14 жаңа тепловозбен толықты. Өндірісті өңірдегі мұнай, алтын, кен өнімдерін тасымалдау негізінен осы тораптық станция арқылы ұйымдастырылады.
Сондықтан бұл жаңа тепловоздар транзиттік жүк тасымалы бойынша тапсырыстарды уақытында орындау жұмыстарын едәуір жеңілдетіп тұр.
Қандыағаш локомотив пайдалану депосының бастығы Тұрлан Борамбаевтың айтуынша, жалпы депо паркінде бүгінде 50 локомотив бар. Оның ішінде 2ТЭ10МК, ТЭМ2, ТЭ33А, ТЭЗЗАС - 21, 2ТЭ25КМ тепловоздары аймақтың жүк тасымалына жегілген.
«Ал 21325КМ сериялы жаңа локомотивтер қыркүйек айынан бастап келе бастады. Жыл соңына дейін барлығы 14 локомотив жеткізілді. Барлығы Ресей елінің Брянск қаласындағы локомотив зауытынан келіп түсті», – деді Т.Боранбаев.
Парктің жаңаруымен станциялардың өткізу қабілеті артып, ол өз кезегінде жүк тасымалы көлемінің ұлғаюына септігін тигізіп отыр. Мамандар алдағы уақытта көрсеткіштердің еселене түсеріне сенімді. Депо бастығы келтірген мәліметтерге сүйенсек, қазіргі уақытта Қандыағаш – Тобыл учаскесінде және Қандыағаш – Сексеуіл учаскесінде жұп және тақ бағытта салмақ нормасы 4500-6500 тонна тартатын тепловоздар жүйткіп жүр.