Қайсар қазақ әйелі
Атырау облысы бойынша меншікті тілші
Бағыт апа – Атырау өңіріндегі атақты Бисалиевтер династиясының өкілі. Бұл отбасы үрім-бұтағымен теміржолшы десек болады. Әкелері Жолдас Бисалиевтің есімі бүкіл батыс жұртшылығына танымал.
Бағыт Жолдасқызы 1976 жылы Ақтөбе теміржол техникумын тәмамдап, Құлсары станциясында еңбек жолын бастайды. Тауар кассирі қызметі оңай емес, құжатпен, қолма-қол ақшамен жұмыс жасағасын жауапкершілігі де орасан зор. Осы жұмысты 40 жылдың үстінде абыроймен атқарып, лайықты сый-құрметпен зейнетке шыққан Бағыт апа жуырда 70 жасқа толды. Құлсары станциясында бірге жұмыс жасаған әріптестері ардагерді құттықтап, әрдайым деніңіз сау, жүзіңіз жарқын болып, ұрпағының қызығын көріңіз деген тілек білдірді.
Бағыт апаның өмір жолы оңай болмаған сынды. Тағдырдың талай сынағын бастан кешсе де қиындыққа мойымай күресе білген қайсар қазақ әйелінің жарқын образы десек болғандай. Жастау кезінде үш бірдей баласы электр желісі өртенген иістен уланып бір күнде қайтыс болды. 1994 жылы отырған үйлерінде газ жарылып, жолдасы және кішкентай екі ұлымен панасыз қалған кездерді де бастан кешірді. Қос бауырының қазасы да жығылған үстіне жұдырық болды. Дегенмен, Бағыт апа осындай тағдыр қиындығына төтеп беріп, күресе білді. Емен ағашы сияқты майысса да құламады. Болған іске болаттай беріктік танытып, тістене жүріп тіршілігін жалғастырды. Шүкір, бүгінде барлық қиындық артта қалып, аяулы жар, ардақты ана отбасында немерелерінің қызығын көріп отыр. Үлкен ұлы Мұрат пен ортаншысы Жантемір аналарының ізімен теміржолшы кәсібін жалғастырып отыр.