Кәсіподақ есеп берді

Жуырда «ҚТЖ-Жүк тасымалы» ЖШС «Батыс» филиалы Атырау қосалқы бөлімшесінің кәсіподақ комитеті мен «Қазкөліккәсіп» ҚБ Орталық кеңесінің Атырау өңірі бойынша өкілдігі есеп берді.  

Жиында баяндама жасаған бөлімшенің кәсіподақ комитеті төрағасы Боранбай Қамиев өткен жылда жасалған жұмыстарға тоқталып, алдағы міндеттерді де атап өтті. Төрағаның айтуынша, Атырау өңірі бойынша барлығы 4453 кәсіподақ мүшесі бар. Соның ішінде Атырау қосалқы бөлімшесі бойынша бүгінде 2375 кәсіподақ мүшесі еңбек етеді. Есепті жылы кәсіподақ комитеттері 84 отырыс өткізіп, онда мәдени-көпшілік іс-шаралар мен спорттық іс-шаралар өткізуді жоспарлау, кәсіподақ мүшелерінің, зейнеткерлердің әлеуметтік, шаруашылық мәселелерін шешу, т.б. мәселелер қаралған. «Өткен жылы көктемгі және күзгі комиссиялық байқауларды қоспағанда, кәсіподақ жетекшілері мен комитет мүшелері желідегі қызметкерлермен жиі кездесіп, олардың еңбек жағдайларына, әлеуметтік мәселелеріне байланысты туындаған сұрақтарды шешу мақсатында тиісті орындарға хат жолдап, 2024-2026 жылдарға арналған Ұжымдық шартқа ұсыныстарын талқылап жинақтады. Осы кездесулерден жиналған ұсыныстар Ұжымдық шартты қабылдауда бірқатар өзгерістерге, яғни әлеуметтік көмектердің жақсаруына септігін тигізді» деді ол.  

Есепті жылы кәсіподақ мүшелерінің еңбекақыларының 1 пайызы мөлшерінде Кәсіподақтың Орталық кеңесіне аударылған мүшелік жарнадан «Бастауыш кәсіподақ ұйымдары туралы» Ережеге сәйкес 68 пайызы – 78 125 000 теңге Атырау қосалқы бөлімшесі кәсіподақ комитетіне берілген. Оның ішінде 17 458 000 теңге Атырау локомотив пайдалану депосына, 22 153 000 теңге Мақат локомотив пайдалану депосына, 12 039 000 теңге Атырау вагон пайдалану депосына, 26 566 000 теңге Атырау қосалқы бөлімшесіне тиесілі. Аталған қаржыны осы мекемелер өздерінің жоспарына сәйкес, ай сайынғы сұраныстарына байланысты әртүрлі мәдени-көпшілік, спорттық іс-шараларға, балалар мен зейнеткерлерді әлеуметтік қолдау жұмыстарына, кәсіподақ белсенділерін, техинспекторларды, келісім комиссия мүшелерін оқытуға, қызметкерлерге материалдық көмек беруге жұмсаған. Атап айтқанда, мәдени-көпшілік, спорттық іс-шараларға, материалдық көмекке, қызметкерлердің еңбек жағдайын жақсартуға, жұмсалған. Сонымен қатар түрлі меркелік іс-шаралар бар. Өңір теміржолшыларының сұрауына байланысты 15 410 000 теңге жазғы спорт алаңын орнатуға алғашқы төлем ретінде аударылыпты. Оның құрылысы наурыз-сәуір айларында аяқталады деп күтілуде.

Биыл Қазақстан теміржолының 120 жылдығына орай журналистер арасында байқау өткізу, сонымен қатар өңір теміржолының тарихына арналған кітап-энциклопедия шығару, спорт алаңын ашу, Ресей теміржолы кәсіподағы мен Қазкөліккәсіп арасындағы меморандумға сәйкес Астрахань-Атырау футбол командаларының жолдастық кездесуін өткізу жоспары бар.  

Жиын соңында жыл бойы жақсы жұмыс жасаған бірқатар кәсіподақ мүшелері марапатталды, олардың қатарында биылғы ультрамарафонда 1-ші орынды жеңіп алған екі желаяқ – Гауһар Толыбаева пен Ерлан Жұпаров бар.