Қызылорда станциясында былтыр 300 мың тоннаға жуық жүк тиелді

Қызылорда станциясының ұжымы өткен жылды табысты қорытындылап,  өндірістік жұмыс көрсеткіштері жоспарын 100,7-142,2 пайыз аралығында асыра орындады.  

Теміржолшылар тарапынан өндірістік маневрлік, пойыздық жұмыстар кезінде жылжымалы құрамдардың қозғалыс қауіпсіздігінің бұзылуына себеп болатын тосын жағдайларға орын берілмеген. Кәсіби міндетіне берік, жұмыстарын бес саусағындай білетінін әріптестерінің өткен жылы жасаған еңбектеріне жоғары баға берген станция бастығы Қайрат Төрединов осы жылға да жағымды болжам жасады.  

– Тек қана жүк тиеудің белгіленген 203 633 тонна жоспары өткен жылы 289 523 тоннаға жеткізіліп, меже 142,2 пайызға жеткізілді. Жоспардың жоғары деңгейде орындалуы тапсырыс берушілермен ортақ мәміле, тиянақты жұмыстың нәтижесі, сонымен қатар ұжымның жанкешті еңбегінің арқасы, – дейді Қайрат Төрединов.

Станция бастығы пойыз құрастырушы Алтынбек Серікұлы, маневр диспетчері Арман Қоңырбаев, станция кезекшісі Дархан Доскеевтің еңбегін ерекше атап өтуді сұрады. Жүк пойыздары вагондарының құжаттарын рәсімдеп реттеуде тауар кассирі Жарқынай Тастыбаева, жүк қабылдап-тапсырушы Апипа Ерешова және аға жүк қабылдап-тапсыршы Гала Утехинаның шапшаңдығы, сауаттылығы мен көп жылғы тәжірибесі де станция жұмысының табысын арттыра түседі деп санайды станция жетекшісі.