Сексеуіл станциясында жолды қардан тазалау жұмысы қарқынды жүріп жатыр
Қызылорда облысы бойынша меншікті тілші
Пойыздардың қозғалыс қауіпсіздігін сақтауда технологиялық талаптардың қатаң сақталумен қатар бірнеше фактордың жанама әсері болатыны белгілі. Осы ерекшеліктерді қаперде ұстайтын аймақ теміржолшылары қазір табиғи факторлармен күресуде.
Биылғы қыс маусымы аса қаталдық танытпаса да жиі-жиі қар жауып, боран соғып, ауа райы сенімсіз болып тұр. Сексеуіл станциясы басшылығы күн сайын пысықтау инструктажын өткізіп, қар тазалау маневрлік жұмыстарға кедергі келтірмеу үшін жұмыс басында белгі беруші адам белгіленіп, ескерту белгісі қойылып, бекет кезекшісіне ескертіліп ДУ-46 кітабына жазба енгізілген.
Ал жолшылар жұмыс істеп жатқанда бірін екіншісі көре алатындай қашықтықты сақтауы, маусымдық киімнің болуы, суықтан қорғанатын заттармен қамтылуы бақылауға алынған. Ауа-райының қолайсыздығына байланысты ШЧ жұмысшылары да бағдаршам, электрожетектрге күтім жасауды арттырып, ЭЧ мамандары электр құрылғыларының үзіліссіз жұмыс жасауын қадағалауда.
Өткен аптада жауған қардан құрылғылар мен жолдарды тазалау жұмысын станциядағы барлық сала теміржолшылары бірлесе атқарды. Әйтсе де негізгі күш жолшыларға түскені белгілі.
Мұрат Байділдаев басқаратын Сексеуіл жол дистанциясының жолшылары станция жолдарынан бастап телімдердегі нысандарды қардан тазалаумен қатар күнделікті жоспарлы жол күтімін де кейінге қалдырған емес.
– Бүгін қар тазалаумен қатар станцияның солтүстік алқымындағы 13-қабылдап-жөнелту жолының ентабанын технологиялық талапқа сай қалыпқа келтіріп жол күтімін жасап жатырмыз. Ағымдық күтім жұмысы кезінде жол жөндеушілер Азамат Тәженов, Ерғали Алимов пен Ғанибек Ахметалиев рельс төсеніші мен бекітпелердің беріктігін қадағалауда. Ерлан Көптілеуов пен Дәуіржан Сахитжанов рельс арасын шаблонмен үнемі өлшеп, еңкіш түскен тұстар биіктетіліп жол төсемін нығыздаудамыз. Бүгін топқа бөлініп жұмыс істегендіктен екінші топтағы жол жөндеушілер Руслан Қалмағанбетов, Жандос Бажиров, Қанай Қалмағанбетовтің тобы біздің алдымызда жолдарды қардан тазалау жұмысын атқарып бара жатыр, біз олардың тазалаған жерлерін үстемелеп бақылап жол күтімін жасап келеміз,– деді Сексеуіл жол дистанциясы телім бастығының орынбасары Жаржан Ермаханов.
