Байланыс құралдары жаңаруда

Сигнализация және байланыс дистанцияларының жұмысын жақсарту жаңа техникаларды кеңірек пайдалану технология дамып жатқан қазіргі заманда аса қажет.  

«Бағдаршамдар мен бұрмалардағы электржетектерінің, станциялардағы рельс тізбектері элементтерінің, батарея шкафтарындағы аккумуляторлардың, стативтер мен релелік шкафтардағы аспаптардың қалыпты жағдайда жұмыс істеуін дистанция мамандары жоспарға сай техникалық кесте бойынша қалтқысыз орындауда», – дейді Атырау магистральдық желі бөлімшесінің СОБ және электрмен қамту бөлімі бастығы Амангелді Бержанов.  

Былтырғы жылы құрылғыларды  күтіп ұстау бойынша жасақталған кешенді жоспар негізінде 144 дана электржетек ағымдық жөндеуден өтіп, 2023-2027 жылдарға жоспарланған өндірістік бағдарламаға сәйкес ШЧ-8 және ШЧ-9 сигнализация және байланыс дистанцияларында автобұғаттау бойынша әуе желісі ұзындығы 13,8 шақырым СБЗПУ 10Х2 маркалы жер асты кабеліне ауыстырылыпты. ШЧ-8-Атырау, ШЧ-9-Ақжайық және ШЧ-11-Құлсары сигнализация және байланыс дистанцияларында 27 аралықта автобұғаттау желісіндегі еңістерінің монтаж сымдарын, 7 дана жол жәшігі мен стрелка қорапшалары, 18 дана релелік және батарея сөресі, 185 дана аккумуляторлар, 10 шақырым магистральдық желі кабельдері, Бейнеу – Оазис, Жамансор-377 бекеттері аралығында, 377 бекеттің өзінде, Мақат, Мұқыр станцияларында барлығы 10 дана бағдаршам бағандары ауыстырылған. Яғни, өңірде көп құрылғылар мен бағдаршамдар түбегейлі жаңарып жатыр. Сондай-ақ, Құлсары, Бейнеу, Мақат, Доссор станцияларына портативті радиостанцияға арналған 4 антенна қондырылып, Д.Нұрпейісова, Афанасьево, Исатай, Тұманды, Коркол бекеттерінде ұзындығы 26,5 шақырым әуе желісінде ілініп тұрған кабельдерінің жері қазылып, көму жұмыстары жүргізілді. 465, 467 бекеттерінде ЭО модульдік ғимаратының айналасына абаттандыру жұмыстары жүргізілді. 470, Бекбике бекеттеріне кезекшілердің демалыс орнына арналған модульдік ғимарат та қондырылып іске қосылыпты.