Семей теміржолында күшейтілген режим енгізілді
Абай облысы бойынша меншікті тілші
Семейлік теміржолшылар «кәрі құда» қыстың әлегімен айқасуда. Соңғы тәуліктерде ауа райының күрт бұзылуына байланысты бірқатар өңірде төтенше жағдай орын алды. Ал бөлімшеде күшейтілген режим енгізілді.
Бөлімше басшысы Алмас Сейсемқановтың тікелей бұйрығымен барлық станция басшылары, вагон шаруашылығы мен жергілікті локомотив бригадалары, сонымен қатар жолшылар шұғыл жұмыс топтарын ұйымдастыруда. Әсіресе тәуліктік кезекшіліктегі жұмысшыларға жауапкершілік артып отыр. Лездемелік жиындар барысында қолайсыз ауа райы жағдайындағы еңбек қауіпсіздігі түсіндіріліп, осы бағыттағы бақылау шаралары күшейтілді. Оның сыртында күндізгі және түнгі уақыттарда қызметтік өткелдер, ғимараттар мен барлық қосындар аумағы қардан тазартылып, құм себілуде. Жұмысшылардың арнайы киімдер мен үсік шалғанда пайдаланылатын жақпамайларды қолдануы да қадағалануда.
Өткен желтоқсан, қаңтар айларында ауа райы жайлы болып, арқаны кеңге салып келген бөлімше теміржолшылары ақпанда күшіне мінген қыспен бірнеше бағытта күрес жүргізуде. Мәселен, Өскемен, Күмістау, Риддер, Аягөз станциялары бойынша қар сенбіліктері өткізіліп жатса, Жаңғызтөбе, Жармада қарлы боран астында жұмыс жүргізуге мәжбүр. Ал Шар станциясында аяз рекордтық көрсеткішке жетті. Филиал директоры Алмас Ғылымұлы бастаған бөлімше басшылары қазір станцияларды аралап, ұйымдастыру жұмыстарының басы-қасында жүр.
Қадағалау, тексеру шаралары әсіресе жол қозғалысына тікелей жауапты ПЧ-42, ПЧ-40 және ПЧ-39 мекемелері бойынша біршама күшейтілген түрде жүргізілуде. Бұл ретте бағыттамаларға арналған бес пневмоүрлегіштер мен жолшыларға тиесілі 82 автокөліктің жарақтылығы басты назарда.
Абай облысындағы барлық күре жолдардың кешкі сағат 20.00-ден бастап таңға дейін жабылуына байланысты жолаушылар пойыздарына біршама жүк түсіп тұр. Алматы бағытынан келетін бірқатар пойыздардың шамалы түрде кестеден кешігуі орын алғанымен, жылжымалы құрамдар қозғалысы штаттық режимде жүргізілуде.
Сондай-ақ ақпанның 16-сы күні Көкпекті ауданындағы қалың қар мен ақтүтек боранға байланысты шұғыл түрде жарияланған табиғи сипаттағы төтенше жағдай теміржолдағы қозғалысқа әсер еткен жоқ.
– Қазіргі таңда барлық станциялар бойынша теміржолшылар күшейтілген режимде жұмыс жүргізіп жатыр. Соңғы тәуліктерде қармен күреске баса көңіл бөлініп отыр. Тосын жайттар орын алған жоқ. Аймақтағы ауа райының құбылмалығына байланысты желі бойындағы жұмыстарға мониторинг жасалуда. Барлық станциялар бойынша пойыз қозғалысы ашық, – дейді Семей ЖТ бөлімшесінің қозғалыс қауіпсіздігі бөлімінің басшысы Расул Кәукен.
Синоптиктер болжамына сүйенсек, осы аптада ел шығысында сынап бағанасы 40 градустан төмендейді. Таулы аудандарда қалың қар мен бұрқасын күтілуде. Қолайсыз ауа райы тек алдағы демалыс күндері ғана сейіледі деген болжам бар.