1 наурыз – Алғыс айту күні
"Қазақстан теміржолшысы" газетінің Жамбыл облысындағы меншікті тілшісі
1 наурыз – Алғыс айту күні қарсаңында Жамбыл облыстық ішкі саясат басқармасының «Қоғамдық келісім» мекемесінің қызметкерлері Жамбыл локомотив пайдалану депосына барып, теміржолшылармен кездесті.
Танымдық іс-шараның мақсаты түрлі ұлт өкілдері еңбек етіп жүрген саланың тыныс-тіршілігімен танысу екен. Локомотив депосында бүгінде онға жуық түрлі этнос өкілі ауызбіршілікпен еңбек етуде. «Қоғамдық келісім» мекемесінің «Ақпараттық жұмыс және қоғаммен байланыс» бөлімінің басшысы Бибігүл Утепова Нұрболат Нұрсейітов басқаратын Жамбыл локомотив депосы қызметкерлерінің мемлекеттік тілде еркін сөйлеп, бір атаның баласындай ауызбіршілікте жұмыс істеп, тапсырмаларды тиянақты атқарып жатқанын жеткізді.
– Депо бастығы бізді цех жұмысымен таныстырды. Техникалық бақылаулардың қалай жүргізілетінін көріп, мұндағы мамандардың біліктілікті арттыру мәселелері қалай шешім тауып жатқанын білдік. Ортақ міндет пен жауапкершілікті жақсы сезінетін неміс, кәріс, украин, қырғыз, түрік, орыс, өзбек, дүнген, тағы да басқа этностардың өкілдерінен құралған ұжым тұрақты жұмыспен қамтып отырған компанияның басшыларына алғыстарын айтуда. Татулығы мен бірлігі жарасып, ауыр жұмысты еңсеріп отырған жұмысшылар өз міндеттерін адал атқарып жүр, – дейді бас сарапшы.
Деподағы әр жұмыс күні теміржолшылардың денсаулық жағдайын бақылаудан басталады. Мұндағы медициналық пункт заманауи құрылғылармен жабдықталған. Ол құрылғымен жұмысшының қан қысымы, тамыр соғысы және алкагольдік ішімдік ішіп-ішпегені тексеріледі.