Күзеттің қос диспетчері
Ақтөбе облысы бойынша меншікті тілші
Қай саланы болсын әйелсіз елестету мүмкін емес. Тіпті темір жолдағы әскерилендірген күзет қызметінде де қыз-келіншектер бар. Кейіпкерлеріміз Балзия мен Райгүл «ӘТЖК» ЖШС Ақтөбе филиалында жұмыс істейді.
Еуропа мен Азия қақпасындағы қырағылық пен шапшаңдықты меңгерген жауынгерлердің жұмысын ұйымдастырып отырған диспетчер қыздардың қозғалысы ширақ. Шекаралық өткелдің үш мемлекетаралық станциясын бақылап отырған арулар күн сайын жүздеген қоңырауға жауап береді.
Балзия Даниярова тәжірибелі диспетчер. Еңбек жолын ол Ақтөбе станциясында бұрмаларды бұрып, оператор болып бастаған. Кейін әскерилендірілген күзет қызметіне диспетчер болып орналасады. Осы қызметте жұмыс істеп жатқанына 33 жыл болыпты.
«Міндетіміз – жүк тиелген вагондардың қауіпсіздігіне жауап беру. Темір жол бойындағы әрбір оқиғаны бақылауға аламыз. Стратегиялық нысандарды қорғау тәртібі бар. Әр ақпаратқа шұғыл жауап берілу керек. Әрі қарай мобильдік топтар арқылы ақпарат жиналады. Оқиға туралы мәлімет аға күзетшілер арқылы бізге беріледі. Біз олардың ақпаратын жинап, орталыққа хабарлаймыз», – дейді ол.
Мекеменің диспетчер қызметінде жүрген бұрымдылардың бірі – Райгүл Жетімекова. Оның еңбек өтілі 17 жыл. Ақтөбедегі теміржол техникумын бітіріпті. Ақтөбедегі әскерилендірілген күзет қызметінде 2006 жылдан бері диспетчер. Ол теміржолшылар отбасында дүниеге келген. Жолдасы да теміржолшы екен.
«Жедел топ өкілдері, күзетшілермен жұмыс істейміз. 24 сағат бойы үздіксіз қоңыраулар қабылдаймыз. Әр қоңырау маңызды. Жауапкершілік жоғары. Жедел хабарлап отыруымыз керек. Шұғыл әрекеттер жасаймыз», – деді күзет қызметіндегі Райгүл Жетімекова.
