Мамандығы – мақтанышы
Атырау облысы бойынша меншікті тілші
«Адал еңбегі үшін» медалінің және «Құрметті теміржолшы» белгісінің иегері Айсәуле Әбдіғалиева ұжымында беделді, әріптестеріне сыйлы жан. Ол еңбек жолын сонау сексенінші жылдары Мақат техникалық қызмет көрсету пунктінде букске май құю слесарі болып бастаған екен.
Кейін вагон операторы, вагон қараушы болып қызметтерін ауыстырады. Өндірісте шыңдала жүріп, ол білімін ұштауды жөн көреді. 1985 жылы Алматы теміржол техникумына сырттай оқуға түсіп, оны ойдағыдай бітіреді. Он жылдың үстінде вагон қараушы қызметін мүлтіксіз атқарады. Жалпы, станцияға тәулігіне ондаған вагондар келеді. Вагон қараушылар ақауларды тапқаннан кейін техникалық күтім не қызмет көрсету пунктіне жібереді. Ал слесарь, дәнекерлеуші, краншылардан құралған бригада кешенді жөндеу жұмыстарына кірісіп кетеді. Енді ол вагондардың жолға шығу жарамдылығын да қадағалау қажет. Техник, аға вагон қараушы, кейін вагон шебері, эксплуатация инженері болып жүргенінде де Айсауле осы процестердің бәрін жіті қадағалап, ісіне адал болуға тырысады. Ақырында өндірісте жиналған мол тәжірибе, біліктілік пен білім үйлесімділігі, адамдармен жұмыс жасай білу қабілеті оны депоның еңбек қорғау саласында қызмет етуіне алып келеді. Күні бүгінге дейін осы салада абыройлы еңбек етіп жүр. Білімін шыңдауды мақсат еткен ол 2006 жылы Алматы көлік академиясын да бітіріп шығады.
«Айсәуле Нысанқызы кәсіби білімі терең, біліктілігі жоғары маман. Өз жұмысына адал, ісіне тыңғылықты, қандай жұмысты да үлкен жауапкершілікпен атқарады. Еңбек қорғау саласында жұмысшыларға қажетті шаралардың бәрін толыққанды іске асырып, тиісті жағдай жасауға барын салып жүргені», – дейді депоның бас инженері Рашид Мұсабаев.
Айсауле Әбдіғалиева отбасында да сүйікті жар, бақытты ана. Жолдасы Нұрасыл Құмарұлы да теміржолшы. Екеуі Ақмарал, Әсел, Орынгүл атты үш қыз өсіріп, тәрбиеледі. Олардың үшеуі де бүгінде жоғары білімді математик, экономист, шет тілі мамандары. Өмірде өз жолдарын тауып, қоғамға адал қызмет етіп жүрген жастар. «Мен үшін мамандығым – мақтанышым, отбасым – бақытым» дейді Айсәуле Нысанқызы.