«Алтын дулыға» жеңімпазы
«Қазақстан теміржолшысы» газетінің тілшісі
Сексеуіл локомотив пайдалану депосының 2023 жылғы жұмыс қорытындысы бойынша Сексеуіл локомотив жөндеу депосы «Үздік мердігер» номинациясымен марапатталды.
2018 жылдан бастап «Қамқор Локомотив» ЖШС «Wabtec» компаниясымен бірлесе отырып жөндеу депосының қызметкерлері арасында қауіпсіздік пен еңбекті қорғау санаттары бойынша «Алтын дулыға» байқауын ұйымдастырып келеді. Теміржол саласында еңбек етіп келе жатқан сала мамандары үшін бұл байқаудың маңызы өзгеден бөлек.
– Біздің салада ерекше орын алатын осы байқау биыл іргелес орналасқан мердігер мекеме – Сексеуіл локомотив жөндеу депосы үшін абыройлы өтті. Конкурстық комиссия жазатайым оқиғалардың болмауы, жұмыс көрсеткіштерінің нәтижесі, еңбек және экология, өрт қауіпсіздігі, сондай-ақ тұрақты жетілдіру және үздік тәжірибелерді енгізу бағыттарындағы жұмыстарын бағалай отырып, «Қамқор Локомотив» ЖШС-нің жеті филиалының арасында Сексеуіл локомотив жөндеу депосын жеңімпаз деп таныды, – дейді Сексеуіл локомотив пайдалану депосы бастығының орынбасары Еркебұлан Аяғанов.
«Қамқор Локомотив» ЖШС техникалық директоры Жанатбек Адамбаевтың айтуынша, компания филиалдары 2023 жылы жаңа жобаларды енгізген. Осы ретте берілген тапсырмаларды жүйелі әрі табысты атқарып, қауіпсіздік жайына ерекше мән беретін Сексеуіл локомотив жөндеу депосының жұмысы жоғары бағаланған.