Теміржолшы-зейнеткер вокзалдарды аралап, әріптестеріне бата берді
Ақтөбе облысы бойынша меншікті тілші
Ақтөбелік теміржолшы-зейнеткер Жұмабай Отарғалиевті қазақстандықтар жақсы таниды. Қазақстанды велосипедпен айналып шыққан ақсақал Наурызда теміржол мекемелерін аралап, әріптестеріне бата беріп, елге амандық тіледі.
Амал мерекесі күні сенімді серігі велосипедіне мінген қария Ақтөбедегі теміржол басқармасы, деполар мен вокзалға барып, теміржолшыларды құттықтап, бата берді.
«Наурыз мерекесі биыл өзгеше тойланып жатыр. Он күн бойы дәстүріміз жаңғырып, ежелгі құндылықтарымыз насихатталуда. Елдің ырысы мол болсын, бейбітшілік заман болсын», – деді ардагер Жұмабай Отарбаев.
Теміржолшы-зейнеткер облыстық ардагерлер кеңесінің мүшесі. Қоғамдық жұмыстарға белсене қатысады. Қазір ол компьютер үйреніп, ағылшын тілі курсына қатысып жүр. Қ.Жұбанов атындағы Ақтөбе өңірлік университетіндегі «Күміс университеті» жобасының белсенді қатысушысы. Күнде 50 жастан асқан азаматтарға арналған тегін курстарға барады. Цифрлық сауаттылық, шетел тілі және емдік дене тәрбиесі деп аталатын үш курсты таңдаған.
«Ілім-білім үйрену қай уақытта да кеш емес. Керісінше, сенімділікті арттырады» дейді ардагер.