Достық станциясында «Қыз сыны» байқауы өтті
«Қазақстан теміржолшысы» газетінің тілшісі
Достық станциясында Наурыз мерекесі қарсаңында «Қыз сыны» байқауы өтті. Оған станцияда еңбек ететін бұрымдылар қатысып, бақ сынасты. Байқау 4 кезеңнен тұрды. Қатысушы арулар алдымен өздерін видео арқылы таныстырып өтіп, «Талаптыға нұр жауар» атауымен екінші кезеңде 10 сұраққа жауап берді. Одан әрі «Өнер тамған он саусақ» кезеңінде бойындағы өнерлерін ортаға салды. Соңғы кезеңде ұлттық киімнің сан үлгілері бойынша киініп, көшпенділер мәдениетінің сән салтанатын паш етті. Қазақтың үкілі бөрік, қынама бешпентінің алуан түрін сахнаға шығарған арулар көпшіліктің қошеметіне бөленді. Олардың қатарында жүк қабылдап тапсырушы қыздар – Алина Сүлейменова әдемі даусымен әуелете ән салса, Ұлжан Берікболова мың бұралған биімен таң қалдырды. Ал тауар кассирлері – Ақмейір Мұхатаева қазақтың салт-дәстүрлерінің бірі – сырға салу салтын көрсетіп, Ақмарал Жеңісова нәшіне келтіріп монолог оқыды. Айтолқын Қадырғажы да ән салып, өз өнерін ортаға салды.
Сайыс нәтижесінде байқаудың жеңімпазы атанған арулар марапатқа ие болды. Жалпы, Достық станциясының кәсіподақ комитетінің демеушілігімен тек жеңімпаздар емес, барлық қатысушылар ақшалай сыйлықтар мен сертификаттарға ие болып, Алғыс хат алды. Теміржол саласында қозғалыс қауіпсіздігін қамтамасыз етуге атсалысып жүрген аруларды сан қырынан танытқан кеш көңілді өтті.