Семейде мерейтойлық челлендж тұсауын кесті
Абай облысы бойынша меншікті тілші
Семей ЖТ бөлімшесінің теміржолшылары ерекше бір челлендждің тұсауын кесті. Қазақ теміржолының 120 жылдығына бағытталған іс-шара теміржолшы кәсібіне құрмет, ұрпақтар сабақтастығын паш етеді.
Жуырда бөлімше басшысы Алмас Сейсемқановтың қатысуымен теміржол мерейтойына даярлық шараларын пысықтауға арналған дөңгелек үстелде аталмыш шара Ардагерлер кеңесі тарапынан құпталған болатын. Міне, мерекелік лептегі ерекше челленджді алдыңғы толқын аға буын бастады.
Алғаш болып Құрметті теміржолшы, «Түрксіб-Семей» мұражайының құрметті директоры, ШЧ-29 бастауыш ардагерлер кеңесінің төрағасы, қоғам белсендісі Мақсұт Көшжанов сөз алды. Теміржол саласына небәрі 20 жасында келіп, содан бергі 68 жыл бойы қол үзбей келе жатқан ардагер көз алдында өткен қазақ теміржолының даму тарихынан сыр шертті, мамандыққа адалдық жайлы жастарға насихат айтты. Әрі қарай челлендж кезегін өзге замандастарына ұсынды.
Жыл бойы жүргізілетін челленджде әр теміржолшы бірнеше минуттық бейнероликте өз өмірбаянына тоқталып, сала жайлы тәжірибесінен түйген ойымен естеліктерімен бөлісіп, мерейтойға орай лебізін білдіреді. Челлендждің ретімен жүргізіліп, әлеуметтік желіде жүктелуіне бөлімшенің жастар ұйымының белсенділері жауапты.
Айта кетсек, 120 жылдық теміржол мерейтойынан бөлек, биылғы жыл Семей теміржолы үшін айтулы даталарға толы. Семей станциясы, Семей вокзалы мен Семей жол дистанциясы және жергілікті локомотив пайдалану депосының іргесі қаланғанына 110 жыл толса, Жаңғызтөбе мен Суықбұлақ станцияларының ашылғанына 95 жыл толады. Алдағы кәсіби мерекеде өтілетін даталар жайлы естеліктер мен құттықтаулар да челлендж мазмұнын байыта түсері анық.