Теміржолшыларға алғыс айтты

Семей ЖТ бөлімшесінде Абай облыстық мәслихатының және «AMANAT» партиясы облыстық филиалының төрағасы Қуаныш Сүлейменовпен кездесу өтті.    

Семей филиалы бастауыш партия ұйымы мүшелерімен еркін форматта, диалог түрінде өрбіген жиын барысында бірқатар мәселелер қозғалды. Атап айтсақ, әсіресе жас буын теміржолшыларды әлеуметтік тұрғыдан қолдау, оларды тұрғынүймен қамту мақсатында облыс бойынша қолға алынып жатқан «Абай жастары» бағдарламасына қатыстыру, мемлекет тарапынан берілетін өзге де жеңілдіктерге қол жеткізу жайында кеңінен сөз болды.  

Қуаныш Сүлейменов теміржолшылар облыстағы ең ірі бастауыш партия ұйымын құрып отырғанын, Айгүл Берікболова жетекшілік ететін ұйым мүшелерінің саны жыл санап артып келе жатқанын айтып өтті және су тасқыны орын алған кешегі сын сағатта теміржолшылардың еңбегін жоғары бағалап, алғыс айтты.    

Кездесуде жаңадан тағайындалған бөлімше директоры Алмас Сейсемқанов партия қатарына қосылып,  партиялық билет пен төсбелгіні облыстық филиал төрағасы өз қолымен салтанатты түрде табыс етті.  

Алмас Ғылымұлы алдағы уақытта партияның міндеттерін орындауда бірлесе қызмет атқаруға әзір екенін жеткізіп, сала қызметкерлерінің мемлекетіміз бен партия тарапынан қолға алынған барлық бастамаларға қолдау білдіретінін айтты. Бұл орайда мәселен, еліміздің тасқын су басқан аймақтарына жиналып жатқан гуманитарлық жүктерді теміржол арқылы жеткізу қарастырылып жатқанын айта кету ләзім. Ол үшін бөлімше тарапынан арнайы вагондар бөлінбек.  

Жалпы, қазіргі күні семейлік сала қызметкерлері партияның облыстық филиалы ұйымдастырып жатқан қайырымдылық қорына мол үлес қосуда. Әрі Аягөз, Жаңғызтөбе, Шар станциясының теміржолшы жастары аудандық филиалдармен бірлесіп, еріктілер қатарында апаттан зардап шеккен жұртшылыққа көмектесуде.