Ақтөбеге ауыр техникалар келді

Ақтөбе станциясына Қызылорда бөлімшесінен 7 платформа және Жаңатас станциясынан екі платформа жеткізілді. Ауыр техникалар өңірдің төтенше жағдай жарияланған аудандарына жіберіледі.

Ақтөбе станциясы басшысының жедел ұйымдастыру жұмысы жөніндегі орынбасары Саят Айтжановтың хабарлауынша, жеткізу жұмыстарында кедергі жоқ. «ҚТЖ» ҰК» АҚ мен жергілікті әкімдіктер тарапынан түскен ұсыныстар жедел қаралып, тасымалдау жұмыстары дереу қолға алынды.  

«Теміржол арқылы тегін, қауіпсіз жеткізу жұмыстары тәулік бойы ұйымдастырылуда. Қызылордадан міне, екі экскаватор, екі бульдозер, су сору техникасы, жол талғамайтын биік машина және қайық келді. Бірден кедендік көлік қызметіне хабарланды. Түсіру жұмыстары ұйымдастырылды. Техникалар төтенше жағдай жарияланған аудандарға жіберіледі. Тағы екі платформа келе жатқаны айтылды», – деді Саят Айтжанов.  

Сонымен қатар, демалыс күндері Жаңатас станциясынан екі платформамен техникалар жеткізілді. Онда моторлы қайық, су сору техникасы, қазу жұмыстарын жүргізетін техника т.б.  Олардың барлығы алдын алу, бекіту жұмыстары жүріп жатқан қауіпті аймақтарға жіберіледі.  

Қазіргі уақытта төтенше жағдай жарияланған Ақтөбе өңірінде су тасқыны ахуалы тұрақталды. Қауіп сейілді. Дегенмен алдын алу шаралары, ауыл халқын эвакуациялық пунктерге көшіру жұмыстары әлі де жүріп жатыр. Торғай өзеніндегі су деңгейінің көтерілуіне қатысты құтқару жұмыстары тоқтаған жоқ.