Атырау облысында су тасқынымен күрес жалғасып жатыр
Атырау облысы бойынша меншікті тілші
Атырау облысында су тасқынымен күрес әлі де өзекті болып отыр. Тасқынмен күресуге ірі кәсіпорындар да үлкен үлес қосып жатыр. «Полимер Продакшн» ЖШС Атырау қаласында қап шығару өндірісін іске қосты.
Құм толтырылған қаптар су тасқынына дайындық кезінде аумақтарды су басуға жол бермейтін бөгет жасап, тұрғын үйлер мен инфрақұрылымды қорғау үшін қолданылады. Зауытқа шикізат «Kazakhstan Petrochemical Industries Inc.» компаниясынан 9 сәуір күні келді. Содан бері олар екі ауысымда жұмыс істеп, күніне 20 мың қап шығарды. Сондай ақ «Доссор-Құлсары» автожолының су шайып кеткен 101-шақырымы қалыпқа келтірілді. Оған 45 адам, 28 техника жұмылдырылып, 12 су өткізгіш тұрба салынды.
Облыста екі ауданда жаға бекіту жұмыстары аяқталып келеді. Махамбет ауданында қазір тасқынға қарсы шаралар тәулік бойы жүріп жатыр. Аудан әкімдігінің мәліметінше, елдімекендерді судан қорғау бөгеттерінің ұзындығы 80 шақырым. Қазіргі уақытта ұзындығы 64 шақырым дамбының 54 шақырымы нығайтылды. Қалған бөлігін бекіту жұмыстары жалғасуда. Аудан бойынша сонымен бірге 19,3 шақырым болатын жаңа бөгет соғу жоспарланып, аталған бөгеттің 15,2 шақырымы соғылды. Жаға бекіту жұмыстарына Махамбет ауданы бойынша, мекемелердің 250 қызметкері, 3500 ерікті, 331 әскери және 226 техника жұмылдырылған. Тасқынға қарсы іс-шаралар Индер ауданында да тәулік бойы жалғасып жатыр. 14 сәуір күнгі жағдай бойынша, жаға бекіту мақсатында ұзындығы 21,5 км бөгеттер салынды. Жағаны бекіту жұмыстарына арнайы 84 техника, 480 мекеме қызметкерлері мен ауыл азаматтары және 350 әскер жұмылдыруда. Сонымен қатар, суға кету ықтималдығы бар Индербор кенті, Елтай, Есбол, Көктоғай, Бөдене, Өрлік және Ынтымақ ауылдарының бөгеттері де көтерілуде. Қызылбалық, Құрманғазы ауылдарында бекітілген жұмыстың 70 пайызы біткен, қалғаны әлі де жалғасуда. Аймақта жүріп жатқан жұмысқа темір жол мекемелерінің қызметкерлері де тартылған.
Атырау облысының ТЖ жөніндегі жедел штабының хабарлауынша, Құлсары қаласында қоғамдық көлік қозғалысы қалыпқа келе бастады. Бүгінде қала ішінде 4 бағытта 14 автобус қатынауда. Қосшағыл, Жаңа Қаратон, Майкөмген, Жем ауылдық округтеріне автобустар қалыпты жұмысына кірісті. Төтенше жағдай орын алғанға дейін Құлсары қаласы ішінде, ауылдық округтерді қоспағанда 12 бағытта 55 автобус қатынайтын. Қала көшелері судан тазартылып, көліктерге жүру толықтай қолайлы болған жағдайда қатынау бағыттары мен автобустар санын артатын болады, – дейді "Батыс Тех Инвест" ЖШС басшысы Әуез Әбіләкім.