Семейлік теміржолшылар жылыту маусымын қорытындылады
Абай облысы бойынша меншікті тілші
Семей ЖТ бөлімшесі биылғы 2023- 2024 жылғы жылу беру маусымын қорытындылады. Аймақ бойынша маңызды саналатын бұл мәселеде тек коммуналдық қызмет саласы ғана емес, теміржолшыларға да жүктелген жауапкершілік аса жоғары.
Биылғы қыс Семей теміржолына қарасты барлық нысандар қатты отынмен дер кезінде қамтылып, жазғы жөндеу жұмыстарының нәтижесі себепті апатты жағдай орын алмады. Мұның сыртында ТЧЭ-24 сынды бірқатар мекемелердің жылу желілері де жаңартылған болатын.
Десек те, шығыстың қаһарлы қысында теміржолшылар үшін үлкен міндет аймақты дер кезінде көмірмен қамту екені белгілі. Осы ретте қатты отын саудасы бойынша дүрбелең орын алған жоқ. Барлық жылу қазандықтары дер кезінде көмірмен қамтылып, ең кемі екі аптаға жететін отын қоры тұрақты түрде сақталып отырды. Оған Семей ЖТ бөлімшесі қабылдаған бірқатар тың шаралар да себеп болды.
Жалпы, биылғы қыста жергілікті теміржолшылар облысты 600 мың тоннаға жуық қатты отынмен қамтыпты. Бұл жылдық жоспардың 99 пайызы деген сөз. Тәулік сайын облыс көлеміндегі әр теміржол тұйығына орта есеппен 30 вагон көмір немесе 2 мың тонна қатты отын уақытында жеткізіліп тұрды. Бұрынғы жылдардағыдай іркіліс, вагон тапшылығы орын алмады.
Айта кетейік, жуырда жылу беру маусымының аяқталуына орай қалалық әкімдікте өткен жиында өңір басшысы шаһарды жылумен қамтуға атсалысқан ұйым басшылары қатарында бөлімше директоры Алмас Сейсемқановқа алғыс айтты.