Тыл ардагеріне құрмет көрсетілді

Ұлы Жеңіс жолында қан төккендер мен тер төккендер қатарында тыл ардагерлерінің орны бөлек. «Барлығы майдан үшін, жеңіс үшін!»  деген ұранмен бел шешпей еңбек еткен бұғанасы қатпаған балалар мен қарттар соғыс кезінде елдегі барлық ауыртпалықты қайыспай көтерді.  

Маңғыстау локомотив пайдалану депосының зейнеткері Жұма Сүйіндіковтің балалық шағы да сондай кезеңге тұспа-тұс келген. Түбек теміржолында тепловоз машинисі болып зейнетке шыққан тыл ардагері қазірде Жаңаөзен қаласындағы Теңге ауылының тұрғыны.

– Колхозда ер азаматтар соғысқа шақырылып, ауылдағы шаруашылықтың бәрі әйелдер мен балаларға қалды. 13-14 жастан ауыр еңбекке жегілдік. Қыстың суығы мен жаздың ыстығында дала мен қырды кезіп, еңбек еттік. Егін де ектік, мал да бақтық. Ашқұрсақ жүріп, жеңіс үшін деп жанталастық, – деп бастан өткенін әңгімелеген ардагер Ұлы Отан соғысы аяқталғаннан кейін, 1946 жылы ФЗО-да 6 айлық тепловоз машинисінің көмекшісін даярлайтын курсты бітіріп, теміржолшы болып еңбек жолын жалғастырады. 1950-1954 жылдары әскери борышын өтейді. 1954-1966 жылдары тепловоз машинисі болып еңбек етеді. 1964 жылы Мақат-Ақтау теміржолы салына бастағанда ұлы іске атсалысады. Маңғышлақ  локомотив депосының Өзен станциясында маневрлік тепловоз машинисі болып 1996 жылы зейнетке шыққанша еңбек етеді.    

Маңғыстау локомотив депосы мен Өзен айналым депосының теміржолшылары мен кәсіподақ өкілдері Тыл еңбеккерін Жеңіс күнімен құттықтап барып,  ардагердің хал-жағдайымен танысып, сый-сияпаттарын табыстап қайтты.