Разъездегі ескі нысандар модульді ғимаратқа ауысып жатыр
Атырау облысы бойынша меншікті тілші
Қиғаштан Сағызға дейін, Мақаттан Бейнеуге дейін 850 шақырымды құрайтын Атырау темір жолы бойында 58 шағын разьезд бар. Олардың көбінде жарты ғасырға жуық қызмет етіп, тозығы жеткен, әбден ескірген ғимараттар тұр. Оларды жаңарту – кезек күттірмейтін мәселе.
Өйткені ескінің аты ескі, қолдануға қауіпті. Опырылып құлауы мүмкін, шұрық-тесік шатырынан су кетеді немесе өрт қаупі бар, т.т.
– Осындай келеңсіздіктерді болдырмау мақсатында Компания ескі разъездерді біртіндеп модульді ғимараттарға көшіруді бастады. Қазіргі уақытта апатты жағдайда тұрған, Құлсары-Бейнеу учаскесі аралығындағы №465 және №467 разъездер жаңа модульді ғимаратқа көшірілді. Алға қарай мұндай жұмыстар жалғасын табады. Ал ескі ғимараттар әуелі есептен шығарылып, сосын демонтажға жіберіледі, – дейді Атырау магистральдық желі директорының бірінші орынбасары Аманқос Жылқыбаев.
Байқағанымыз, модульді үйдің көлемі бұрынғыдан әлдеқайда үлкен. Мұнда кезекшінің бөлмесі, бүкіл байланыс құралдары, СОБ, электр құрылғылары автоматтандырылған, сондай-ақ тамақтанатын және демалыс бөлмелері, тоңазытқыш, теледидар да бар. Аталған бекеттер жаңа орынға толықтай көшіріліп, қолданысқа енгізілген, толыққанды жұмыс жасап тұр. Сонымен қатар ғимарат алды абаттандырылып, брусчаткалар төселіп, ағаштар отырғызылып, айналасы абаттандырылған. Разъезде ауысыммен 4 кезекші жұмыс істейді.
