Локомотивтер көктемгі байқаудан өтіп жатыр

Маңғыстау локомотив пайдалану депосының паркінде бүгінде елуге жуық тепловоз бар. Дегенмен оның тек 31-і ғана көктемгі комиссиялық байқаудан өтуі жоспарланған.  

Қалғандарының бұл байқауға қатыстырылмау себебі неде және оларды жазғы маусымға дайындау жұмыстары қалай жүріп жатыр, т.т. сауалдарға жауапты  жөндеу бөлімінің басшысынан алдық.    

Деподағы көктемгі комиссиялық байқау 10 сәуірде басталған, мамыр айының соңына дейін жалғасады. Байқау барысында парктегі 46 тепловоздың 31-і көктемгі комиссиялық байқаудан өтуде. Олар 15 – 2ТЭ10МК, 11 – ТЭМ-2 және 5 – ТЭ33А тепловоздары. Комиссиялық байқаудың алдын ала отырысы бойынша қажетті жоспар бекітіліп, аталған жұмыстарды жүзеге асыратын шебер локомотив бригадалары таңдалған. Бригада мүшелері Маңғыстау депосында байқаудан өтетін тепловоздарды жуып, тазалап, кузов, капот, жүріс бөлігін сырлап, ішкі сыртқы әрін келтіру жұмыстарын жүргізуге жауапты. Әр тепловозға тиісінше локомотив бригадалары бекітілген. Соның нәтижесінде жұмыс сапалы әрі уақытылы орындалуда екен.  

– Комиссиялық байқауға жіберілетін 2ТЭ10МК сериялы 15 тепловозға Мақат, Шалқар, Сексеуіл, Ақтөбе деполарында СО-1,2,3 сервистік қызметтері көрсетіледі. Ал ТЭМ-2 сериялы 11 тепловозға жергілікті «Ғасыр-Маңғыстау» ЖШС депосында техникалық қызмет көрсетілуде. Қалған ТЭ33А сериялы 5 тепловоз болса, Маңғыстау депосынан комиссиялық байқаудан өтеді. Қазірге дейін 2ТЭ10МК сериялы 14 тепловоз комиссиялық байқаудан өтті. Арыс қаласында іссапарда жүргендіктен бір тепловоз әзірге өткен жоқ. ТЭМ сериялы тепловоздардың бәрі түгел комиссиялық байқауға ағытылды. Бүгінде оның тек екеуі жөнделіп жатыр, қалғаны толық даярлығын алды. ТЭ33А маркалы тепловоздың бесеуі де комиссиялық байқаудан өтіп, жолсапарда жүр, – деп мәлімет берді  Маңғыстау локомотив депосының жөндеу бөлімінің басшысы Сәбит Зияев.

Сондай-ақ, айтуынша комиссиялық байқаудан өтпейтін 15 тепловоз бар. Олардың байқаудан өтпеу себебі олардың СО-4,5 және ТО-7,8 күрделі жөндеуге  жоспарлануына байланысты. Мұндай жөндеу жүргізу барысында локомотивтердің дерлік барлық агрегаттары мен бөлшектері ауыстырылады. Сондықтан ондай жөндеуден өткен тепловоздарға комиссиялық байқау жүрізілмейді. Ал жоғарыдағы 15 тепловоз биыл осы аталған үлкен жөндеуден өткен екен.