Бурабайдағы рельс дәнекерлеу кәсіпорнында жұмыс қарқынды жүріп жатыр

Биыл Магистральдық желі дирекциясы еліміздің теміржол желілері бойынша 590,15 шақырым жолға күрделі жөндеу жүргізуді жоспарлап отыр. Осыған орай Бурабай курорты станциясында орналасқан рельс дәнекерлеу кәсіпорнында да жұмыс қыза түскен.

Өйткені аталған кәсіпорын алдында жаңа рельстерден 232,52 км жолды құрайтын жаңа ұзынөлшемді иіндерді дәнекерлеп шығару міндеті тұр. Яғни еліміздегі үш рельс дәнекерлеу кәсіпорны арасында бурабайлықтар еншісіне иіндерді дәнекерлеу бойынша жоспарланған жалпы көлемнің 39,4% тиіп отыр.  Жалпы, Бурабай курорты рельс дәнекерлеу кәсіпорны жаңа 100 метрлік рельстерден ұзынөлшемді рельс иіндерін дәнекерлеумен, ескі жарамды рельстерді жөндеумен және олардан 25 метрлік және ұзынөлшемді иіндерді дайындаумен айналысады. Сонымен қатар кәсіпорын ПРСМ машиналарымен жолдағы рельс иіндерін контактілі дәнекерлеу әдісі арқылы қалпына келтірумен, жолдағы рельстердің тозған ұштарын балқыту, бүйірлік орамды тегістеу әдісімен алу, бағыттағыш бұрмалардың айқастырмаларын балқыту және тегістеу сияқты жөндеу жұмыстарымен айналысады.

Сондай-ақ кәсіпорында негізгі жұмыстардан бөлек, Жол және құрылыс департаментінің тапсырыстары бойынша жолдың үстіңгі құрылымы үшін рамалар, фигуралық рельстер, өтпелі профильді рельстер сияқты материалдар дайындалады.  

«Үстіміздегі жылдың алғашқы үш айында 238,25 км/жолға жаңа рельстерден, 40 км/жол көлемінде жөндеуден өткен ескі жарамды рельстерден ұзынөлшемді рельстер   дәнекерленіп, жоспардың орындалуы 100% құрады. Сонымен қатар 15,4 км/жолдық жаңа теңестіру рельстері дайындалды, фрезерлеу, ескі жарамды рельстерді жөндеу жоспары 18 км/жол шамасында орындалды. Сондай-ақ 10,2 км/жол көлемінде ескі рельстерді жөндей отырып, 25 метрлік рельстер дайындалды. Бағыттағыш бұрмалар үшін  94 дана рамалық рельстер әзірленіп, жолдағы бағыттағыш бұрманың 660 дана айқастырмасы балқытылды және де ПРСМ машиналарымен жолдағы рельс иіндерінің 7 340 жуық түйіспесі қалпына келтірілді», – дейді Бурабай курорты РДК Өндірістік-техникалық бөлім бастығы Владимир Михайлович.  

Оның айтуынша, жалпы кәсіпорын бойынша негізгі жұмыс түрлері бойынша өндірістік бағдарлама жоспары 107% орындалған. Бұдан бөлек, кәсіпорын қызметкерлері тарапынан ұзындығы 800 метр болатын арнайы рельс тасымалдайтын пойыздар жаңа және ескі материалдардан дәнекерленген ұзын өлшемді рельс иіндерін тасымалдап, сондай-ақ алдағы жөндеу жұмыстары үшін Жол дистанцияларынан ескі жарамды рельстерді алып келген. Кәсіпорын қарамағындағы 7 бірлік ПРСМ машинасының екеуі биыл күрделі жөндеуден өтпек, бұл өз кезегінде жолдағы рельстерді дәнекерлеу бойынша көп көлемді игеруге мүмкіндік бермек.