Станцияға саяхат
Атырау облысы бойынша меншікті тілші
Мамандық таңдау – болашаққа қадам басқан әр жастың алдында тұратын сұрақ. Қолына аттестат алған жан нақты бір мамандықтың тізгініне жармасуға тура келеді. Жуырда Атырау станциясына келген студенттер теміржолшы мамандығын таңдапты.
Атырау политехникалық колледжінің «Теміржол көлігінде тасымалдауды басқару және ұйымдастыру» бөлімінің 2 және 3 курсында оқып жатқан студенттерді ұстаздары Салтанат Ибраева бастап келді. Айтуынша, бүгінде колледждің аталған бөлімінде 56 студент білім алып жатса, 4 курс шәкірттері қазіргі уақытта өндірістік тәжірибеден өтіп жүр. Өкініштісі, былтыр теміржолшы мамандығына құжат тапсырған түлек болмапты, салаға қызығушылық төмендеп кеткен.
Станцияға келген 2-3 курс студенттерін станция бастығы Бекжан Жиенбетов пен бөлімшедегі кадрлар бөлімінің менеджері Ерлан Тарихов қарсы алды. Станция бастығы теміржолшы мамандығы туралы өзі өткен жолдарды мысалға келтіре отырып әңгімелеп, теміржолшы болудың қиындығы мен жауапкершілігі, темірдей тәртіп, қозғалыс қауіпсіздігі мен еңбек қорғау, маман білуге тиіс басты қағидаларды түсіндірді.
Мамандар бөлімінің бастығы да қазіргі кездегі теміржолшылардың әлеуметтік жағдайы, жалақысы, еңбек процесінде арнайы киіммен, құралмен қамтамасыз ету, жұмысшыға қойылатын талап, оның құқығы мен міндеттері, еңбек және қозғалыс қауіпсіздігін сақтау бойынша жауапкершілігі, жас маманның мансаптық өсу жолдары, т.б. жайттарды әңгіме қылды.
Студенттер өздерін қызықтырған сауалдарын қойып, оған кәсіби жауап алды. Станцияны аралап, өндіріспен танысты. Сол күні теміржолшылар қаладағы «Бином» мектебінде де болып, кәсіп таңдау бағытында оқушылармен кездесу өткізді.