Қозғалыс мамандары Семейде бас қосты

Жуырда «Семей ЖТ бөлімшесі» филиалының базасында қозғалыс қауіпсіздігі мәселелері бойынша семинар-кеңес ұйымдастырылды.

Басқосуға барлық бөлімшелердегі қозғалыс қауіпсіздігі бөлімдерінің басшылары мен бас мамандары, қозғалыс ревизорлары, Семей филиалы басшылығы қатысты. Іс-шараның басты мақсаты теміржол қозғалысының қауіпсіздігін қамтамасыз ету бойынша осы салаға жауапты қызметкерлер арасында өзара тәжірибе алмасу, ағымдағы жылдың басынан бастап орын алған ақаулықтарды талдау, оған себеп болған түйіткілді мәселелерді бірлесіп талқылау болатын.  

Жиын барысында сөз алған Семей ЖТ бөлімшесінің басшысы Алмас Сейсемқанов аталмыш тақырыптың өзектілігі жайында сөз етіп, желі бойындағы тосын жайттардың орын алмауы үшін, яғни қозғалыс қауіпсіздігін сақтау жолында мұндай жиындардың берер маңыздылығына тоқталды.

Семинарда пойыздық және маневрлік жұмыстар тиімділігін арттыру, қозғалыс кезінде жылжымалы құрамдардың соқтығысуын болдырмау бойынша жүргізілетін профилактикалық іс-шаралар да пысықталды. Семинарға сарапшы ретінде қатысқан техникалық саясат департаментінің өкілдері, бас менеджер Рита Еркебаева мен менеджер Светлана Горобец сөз алып, компания бойынша қолға алынған жұмыстар, атап айтқанда жекелеген актілерді жетілдіру мәселелері жайында сөз қозғады.  

Семинар барысында сонымен қатар қозғалыс қауіпсіздігін бұзу жағдайлары бойынша қызметтік тергеулерді ұйымдастыру ісі де талқыланып, қатысушылар озық әдіс-тәсілдерді қолдану бойынша өзара тәжірибе алмасты, пікір бөлісті.  

– Семинар-кеңес «ҚТЖ-Жүк тасымалы» ЖШС басшылығы тапсырмалары шеңберінде өткізіліп отыр. Маңыздылығы сол, осынау жиын барысында қозғалыс қауіпсіздігін қамтамасыз ету шаралары толықтай қайта пысықталып, осы бағыт бойынша жұмыс жүргізетін мамандардың практикалық білімдері жүйеленді. Сәйкесінше, бөлімшелердегі жүргізіліп жатқан қызмет сапасы да артады деген ойдамыз, – дейді бұл орайда пікір білдірген Семей ЖТ бөлімшесі қозғалыс қауіпсіздігі бөлімінің бастығы Расул Кәукен.