Деподағы шығын көрсеткіші төмендеп келеді

Түркістан локомотив пайдалану депосында алдын ала болжанған жұмыс жоспары нәтижелі орындалып, жұмсалуы тиіс шығын көрсеткіштері төмендеп келеді.

Бұл тапсырманың орындалу процесін ұтымды үйлестіре алудың нәтижесі деуге болады. Деподағы шұғыл техникалық есепке алу бөлімінің басшысы Ләззат Құлымбетованың айтуынша, 7 адамнан құралған қызметкерлер тәулігіне 100-120, кейде 150-ге дейін жылжымалы құрам құжаттарын өңдеумен айналысады. Осылайша, олар басшылық бекітіп берген Т-4 жоспарының орындалуын мұқият бақылап келеді.

– Мәселен, межеленген жұмысты уақытылы әрі сапалы орындау үшін бізге 91,914 тонна SAE40 майы керек делініп, іс жүзінде қолданылған көрсеткіш 82,630 тоннаны құрады. Нәтижесінде 9,235 тонна май үнеммен жұмсалды, – дейді Ләззат Әбдімүтәлқызы.  

Үнемделген көрсеткіш мұнымен шектелмейді. Айталық, жыл он екі ай бойғы жоспарлы жұмыс 107,9 пайызға артығымен орындалғанынан бөлек, электр энергиясы 54 137 кВт-қа, ал жылу қазандығындағы су қолдану 615 текше/метрге дейінгі көрсеткішті құраған. Осылайша, кәсіпорынның су тұтынуы жоспарлағаннан аз болып, істі оңтайлы үйлестірудің нәтижесінде орынсыз ысырапқа жол берілмеуде.