Арыс станциясында жүк вагонға ұрлыққа түскен күдіктілер ұсталды

Жуырда «Әскерилендірілген темір жол күзеті» ЖШС Түркістан филиалының Арыс станциясындағы атқыштар командасының қызметкерлері екі бірдей ұрлықтың алдын алды.

Команда бастығы Қайыржан Қонысбековтің айтуынша, таңалакеуімде станция аумағында қызметтік міндетін атқарып жүрген күзетші Н.Сәдуақас аға күзетші Н.Өмірзақовқа хабарласып, солтүстік парктің 12 жолында тұрған жүк пойызындағы вагонның қорғасын бекітпесін (пломба) бұзу әрекеті болғанын хабарлайды.  

Едел-жедел оқиға орнына барған мамандар қорғасын бекітпесінің бұзылғанын растап, күдіктінің аккумулятор батараеясын ұрлауға әркеттенгенін анықтаған. Атқыштар командасының күзетшілері Е.Боранбаев пен К.Атамқұлов жергілікті құқық қорғау органдарының өкілдерімен бірлесе жұмыс жүргізуі нәтижесінде 1998 жылы туған Н. А. есімді азамат тұтқындалды.  

Көп ұзамай атқыштар командасының тағы бір күзетшісі А.Нұранбаев та ұрлық оқиғасын әшкереледі. Сұрыптау паркінің 85-ші жолында тұрған вагондардың кран-шүмегінің шеткі бөлігі шешілгенін байқаған ол дереу тиісті орындарға хабар береді. Оқиға орнына сол сәтте-ақ мобильді жедел анықтау тобының қызметкерлері мен құқық қорғау органының өкілдері жетіп, ізін суытпай әрекет ету нәтижесінде 1992 жылы туған М. Д. есімді азамат күдікке ілінеді. Өкінішке орай, тергеп-тексеру соңында вагон бөлшегін ұрлаған күдікті станцияда белгі беруші болып жұмыс істейтіні анықталған.  

– Қазіргі кезде күдіктілерге қатысты құзырлы органдар тарапынан іс қозғалды. Дерек, дәлелдердің барлығы тергеушілерге ұсынылды, – дейді Арыс станциясындағы атқыштар командасының бастығы Қ.Қонысбеков.