Жол дистанциялары жаңа көліктермен толықты
Қызылорда облысы бойынша меншікті тілші
Сыр бойының теміржолшылары үшін биылғы жыл берекелі болып тұр. Әсіресе жол шаруашылығы үшін игілікті істер қатары көп. Жол дистанциялары жаңа техникалармен толығуда.
Кеше ғана Қызылорда магистральдық желі бөлімшесіне 4 су жаңа көлік табысталды. Қытайдың ірі автомобиль құрастыру компаниясының зауытынан шыққан Dongfeng машиналары техникалық жағынан жоғары деңгейде жабдықталған.
– Биылғы жыл біздің ұжым теміржолшылары үшін жағымды жаңалыққа толы. Жыл басында заманауи үлгідегі МПТ мотовозы берілген еді. Енді бүгін Сексеуіл жол дистанциясының теміржолшыларына жол қауіпсіздігін сақтауды арттыру мақсатында құрал-сайманмен қоса адамдарды және тек адамдарды тасуға арналған вахтовка сипатындағы 4 автокөлік табысталды. Қытайлық бұл автокөліктердің қызмет көрсету мерзімі 10-15 жылды құрайды, – дейді дистанция бастығы Мұрат Байділдаев.
Көліктер 4WD, яғни толық жетекті, сыйымдылығы 7 және 40 адам арасын құрайды, 4 төмен, 4 жоғары жылдамдықтағы қозғалтқышы бар. Сондай-ақ климаттық бақылаумен, алдыңғы және артқы камераларымен жабдықталған. Артқы жағындағы бөлігінде құралдар салатын бүйірлік тақта бар, көліктің жүк көтергіштігі де жақсы. Жүргізуге де өте ыңғайлы деседі. Теміржолды қапталдап жүретін көліктің жол талғамайтындығы басқа көліктерден ерекшелендіріп тұрады. Жолшылар үшін де маңыздысы осы. Енді дистанция жұмысшылары Сексеуілдің ойлы-қырлы, құмдауыт даласымен теміржолдың кез келген теліміне кедергісіз әрі қауіпсіз қатынайтын болады.