Атырау вагон пайдалану депосы қосалқы бөлшектермен қамтамасыз етілуде
Атырау облысы бойынша меншікті тілші
Қызмет көрсету аясы Астрахань облысына таяу Ақсарай станциясынан бастап Бейнеу мен Қандыағаш аралығын қамтитын Атырау вагон пайдалану депосы алғашқы жартыжылдықты жақсы көрсеткішпен қорытындылады.
Осы аралықтағы вагондардың қауіпсіз қозғалысына жауапты деполықтар кінәсінен қозғалыс қауіпсіздігінің бұзылуы, апатты жағдайлар, басқа да ақаулық орын алмаған. Депо учаскесінде вагондардың бұзылуы немесе Мақат, Құлсары, Сазанқұрақ станцияларында құю барысында цистерналардан сұйық жүктердің ағып кетуі тіркелмеген.
Дегенмен, жүк және жолаушы пойыздарының 9 рет кідіру жағдайы орын алған, оның негізгі себептері: қысымның түсіп кетуі, ақауы бар вагондарды ағыту, техникалық дайындықтың дер кезінде болмауы, тежегіш жабдықтарының ақаулығы сияқты мәселелер. Вагон қараушылар ақауы анықталған вагонды техникалық күтім не қызмет көрсету пунктіне жібереді. Ал слесарь, дәнекерлеуші, краншы, құрушылардан құралған бригада кешенді жөндеу жұмыстарына кіріседі. Бүгінде депоның 4 техникалық күтім және қызмет көрсету пункті, 2 бақылау пункті, 15 қауіпсіздік посты бар.
«Өткен жылы КТСМ арқылы 77 503 пойыз бақылаудан өтіп, жоспар 99,52% орындалды. Вагон буксының қызуы, тежеу, сүйретілу жағдайларынан 22 пойыз тоқтатылған. Жыл басынан бері келіп түскен ақаулы вагондардың жалпы саны 2 554 болса, соның ішінде 334 жартылай вагон ағымдағы ағыту жөндеуден өтті. Олардың көбінде доңғалақтардың және тежегіштердің ақаулығы орын алған», – дейді депо бас инженері Рашид Мұсабаев.
Деподағы күрмеулі мәселенің бірі – қосалқы бөлшектердің жетіспеушілігі. Соған орай биылғы жылы да өткен жылдағыдай қомақты қаржы бөлініп, оған жиынтық колодка, бұранда, құлып, тежегіш башмақтың втулкасы, ішкі серіппе, швеллер, ажыратылған кран, т.б. қосалқы бөлшектер мен техникалық құралдар алынған. Ұжымда жұмысшылардың біліктілігін арттыру мақсатында және қауіпсіздікті сақтау бойынша айлықтар өткізіліп тұрады. «Бүйір рамасын бақылау», «Назар аударыңыз: доңғалақ» айлықтарында техникалық және практикалық сабақтар өткен.