«Өмір жолым – темір жолым!»
Түркістан облысы бойынша меншікті тілші
«Жүк тасымалы» ЖШС Шымкент жүк тасымалы мен Шымкент магистралдық желі бөлімшесі ұйымдастырған «Өмір жолым – темір жолым!» атты салтанатты шара кәсіби мерекенің сәнін келтірді.
Шымкент шаһарындағы Әзілсықақ театрының ғимаратында өткен жиында 74 теміржолшының мерейі өсіп, мәртебесі биіктеді. Теміржолшылар арасында марапаттың ең биігі саналатын «Құрметті теміржолшы» атағы Шымкент жол дистанциясының шебері Төребек Марзақараұлына берілді. Ал компания президентінің тарапынан берілетін «Адал еңбегі үшін» төсбелгісі оңтүстіктің 3 теміржолшысының кеудесінде жарқырады. Бірқатар сала еңбеккерлері Ұлттық компания президенті Н.Сауранбаев пен Шымкент жүк тасымалы бөлімшесінің бастығы Н.Байғазиевтің және Шымкент магистралдық желі бөлімшесінің бастығы А.Қойлыбаевтың Алғыс хатымен және Құрмет грамотасымен марапатталып, «Үздік маман», «Кәсібі бойынша үздік» атанған азаматтар болды.
Мерекелік іс-шара теміржолшылар қаласы атанған Арыс қаласында жалғасты. Мұнда 7 мекеме бас қосып, ауқымды мерекелік жиын өткізді. Оған бөлімше басшысы Н.Байғазиев пен Шымкент магистральдық желі бөлімшесінің кәсіподақ ұйымының өкілдері қатысып, теміржолшылардың қуанышына ортақтасты. Арыс станциясында өткен марапаттау рәсімінің соңында мерекелік дастархан жайылды.