Модульдік жатақхана пайдалануға берілді

Ақтөбе электрмен жабдықтау дистанциясының Әйтеке би электрмен жабдықтау ауданында модульдік жатақхана пайда болды.

Жоса шағын бекеті аумағына орналасқан ғимаратта желі бойында жұмыс істеуге шыққан жұмысшылар демала алады. Жатақхана сыйымдылығы – 10 адам.  

Заманауи технологиялармен жабдықталған модульдік нысан – Ақтөбе магистральдық желі бөлімшесінің алғашқы жатақханасы. Ақтөбе электрмен жабдықтау дистанциясының бастығы Сәкен Орынбаев Әйтеке би электрмен жабдықтау ауданына арнайы барып, теміржолшылардың екінші үйін салтанатты түрде ашып, қуаныштарына ортақтасты.  

«Бұл модульдік жатақхана – ұлттық компанияның еңбекті қорғаудағы елеулі жұмыстарының бірі. Жол бойында жүретін теміржолшылардың жағдайын жасауға бағытталған игі шара. Желіге шыққан жұмысшылар кез келген уақытта осында демалып, ас-суын ішіп, тіпті қона жатып жұмыс істеулеріне болады. Ғимарат керек-жарақпен толықтай жабдықталған. Қыста жылуы, жазда салқындатқышы бар, жігіттер қуанып жатыр», – дейді Сәкен Орынбаев.  

Модульдік жатақхана іші кең. Он адамға арналған екі жатын бөлмесі бар. Жарық, жылу желілеріне қосылып, су тартылған. Тамақтану бөлмесі, санузел, салқындатқыш, киім кептіру шкафы бар. Жуынатын бөлмеге кең екі заманауи душ қойылған.  

Жоса бекеті электрмен жабдықтау дистанциясының бұл жердегі қызмет көрсету аумағының ортасы саналады. Әйтеке би станциясына қарай 80, Сарысай учаскесіне дейін 57 шақырым жер. Әйтеке би электрмен жабдықтау ауданы барлығы 137 шақырымға қызмет етеді. Жатақхана телімнің дәл ортасында тұр. Ақтөбе магистральдық желі бөлімшесінің басшылығы болашақта осындай модульдік жатақханалар санын арттырмақ.