Министр Маңғыстауға келді
![](https://rail-news.kz/uploads/2024/08/20/qE9fVzh3MpclA437ioTO7fjSiIzl9o2V9VBInRMb.jpg)
![](https://rail-news.kz/img/noimg.png)
Маңғыстау облысы бойынша меншікті тілші
ҚР Көлік министрі Марат Қарабаев Маңғыстауға іссапармен келді. Теңіз порттарын дамыту жоспарының іске асырылу барысымен танысқан ведомство басшысы жергілікті тұрғындармен де кездесті. Түбек жұртшылығы министрге Бейнеуге жаңа вокзал салу, Маңғыстау – Ақтөбе бағытындағы жолаушы вагондарын жаңарту сынды теміржол саласына қатысты сауалдарын жолдады.
Ақтау, Құрық, Баутино теңіз порттары мен Саржа, Ерсай, Ақтау Солтүстік теңіз терминалдарының жұмысымен танысқан Марат Қарабаев Каспий теңізіндегі ірі көлік инфрақұрылымдарының қазіргі әлеуетінен де хабардар болды. Көлік министрлігінің хабарлауы бойынша, осы сапарда белгілі болғандай, бүгінде теңіз инфрақұрылымын дамыту аясында қосымша контейнерлік терминалдар салу, қайта тиеу техникасын жаңарту, логистиканы дамыту, кедендік және әкімшілік рәсімдерді оңайлату, сондай-ақ ТХКБ және Солтүстік-Оңтүстік дәліздерін цифрландыру жұмыстары атқарылуда. Жалпы, осы жұмысты іске асыру қорытындысы бойынша 2030 жылға қарай қазақстандық порттардың өткізу қабілетін ағымдағы 21 млн тоннадан 30 млн тоннаға дейін ұлғайту жоспарланған.
Аталған жұмыстар ТХКБ-ны дамыту шеңберінде қабылданатын кешенді шаралардың бір бөлігі және осы маршрутта жүктерді тасымалдау бойынша өсіп келе жатқан қажеттіліктерге қызмет көрсетуді қамтамасыз етуге мүмкіндік береді.
Өйткені бұл бағыт бойынша жүктерді тасымалдау көлемі уақыт өткен сайын артып жатыр. Мәселен осы жылдың өткен жеті айы ішінде 62 пайызға ұлғайып, 2,5 миллион тоннаны құраған. Былтырғы салыстырмалы мерзім ішінде бұл көрсеткіш 1,6 миллион тонна болған.
Министр сондай-ақ Баутино теңіз портының акваториясындағы кемелер қозғалысын басқару жүйесінің жұмысымен де танысты. Навигациялық қауіпсіздігін қамтамасыз ететін және теңізде авариялық жағдайлардың туындау қаупін алдын алатын бұл жүйе биылғы тамыз айында Құрық теңіз портының акваториясында іске қосылған. Келесі жылы Ақтау портына жоспарланған екен.
Бұл шараларды іске асыру СОЛАС-74 халықаралық конвенциясының талаптарына сәйкес Каспий теңізінің Қазақстандық секторында навигациялық қауіпсіздікті қамтамасыз етуге мүмкіндік беретін көрінеді. Одан бөлек қазіргі кезде Құрық порты акваториясының түбін тереңдету жұмыстары жүргізіліп жатыр екен. Алдағы уақытта аталған аумақта теңіз түбі 1,5-2 метрге тереңдейді. Бұл жұмыстарға еуропалық компанияның арнайы техникасы жұмылдырылған. Мұндай тереңдету жұмыстарын Ақтау портында да жүргізу межесі бар.
Ал Бейнеуге вокзал салу мәселесіне келсек, бұл туралы Көлік министрлігінің телеграмдағы парақшасында хабарлауынша, бұл жайт министрліктің қарастыру жоспарында.