Техникалық күтім жоспарға сай жасалуда

Қызылора белгі беру және байланыс дистанциясында биылғы жеті айда пойыздық және маневрлік, өндірістік жұмыстар кезінде пойыздардың қозғалыс қауіпсіздігінің бұзылуы орын алмаған, тосын жағдайларға жол берілмеген.

Байланыс құрылғыларына  күнделікті бақылау мен күтім жасалмаса, ақау пайда болып, жұмыстан тыс қалуы әбден мүмкін. Сол үшін дистанцияда әрбір байланыс тетігіне күнделікті, апталық, айлық мерзімде, сосын бір жылда бір мәрте толық бақылау жүргізу регламенті бекітіліп, әр теміржолшының кәсіби міндеті белгіленген.

Жалпы жеті айда пойыздардың қозғалыс қауіпсіздігінің бұзылуы орын алмағанмен, байланыс құрылғыларының ішінара кідірісі орын алып, СОБ құрылғыларының екі рет жұмыстан тыс қалуы тіркеліп отыр. Кідірістер жол, электрмен жабдықтау және өзге мекемелердің есебіне тиесілі болған. Мысалы сигналдық нүктенің релелік шкафтарындағы ТМ-15 RWD типті трансмиттерлік блоктың ақаулы болуы, фидердің қате қосылуынан сигнал беру тетігінің қызыл түс көрсетуі, шығыс сигналының көмескі көрінуі секілді белгілердің орын алуы жылжымалы құрамдардың кестелі қозғалысының өзгеруіне себеп болған. Алайда дистанция мамандары орын алған жағдайды дер кезінде реттеп, пойыздардың кідіріссіз өтуіне мүмкіндік жасаған.    

– Өткен жеті айда телімдердегі 24 станция мен 5 бекетте орналасқан белгі беру мен байланыс құрылғыларына техникалық күтім жасау жоспарға сай жүргізілді. Бірінде монтаждау жаңартса, енді бірінің тетіктері технологиялық талапқа сай ауыстырылды. Ал соңғы шілде айында Қызылорда мен Шиелі станцияларында электрожетекке монтаж жасалды. Анакөл, Тартоғай, Қызылтам, Бақтысай, Қаракеткен, Бәйгеқұм, Қараиірім станцияларында қуат көзі панелі тексеруден өткізіліп, пойыздардың қозғалыс қауіпсіздігін сақтау бағытында едәуір жұмыс атқарылды, – деді дистанцияның техникалық бөлім басшысы Нұрлан Жүсіпбаев.

Жалпы дистанциялықтардың жұмысы техника мен құрылғылардың сенімді қызметіне қарай бағаланатынын ескерсек, қызылордалықтар көрсеткіші талап деңгейінде нәтижеленіп отырғанын атап өткен жөн.