ҚТЖ өкілдері Қызылордада жүк жөнелтуші және экспорттаушылармен кездесті
Қызылорда қаласында ҚТЖ өкілдерінің өңірдің негізгі жүк жөнелтушілерімен және экспорттаушыларымен кездесуі өтті, онда 2024 жылдың 8 айындағы жүк тасымалы саласындағы жұмыс нәтижелері, компанияның ағымдағы қызметі талқыланды, деп хабарлайды Rail-news.kz.
Осы жылдың қаңтар-тамыз айларында Қызылорда жүк тасымалы бөлімшесі бойынша 2 млн тонна, оның ішінде қазақстандық алушылар үшін 1,3 млн тонна жүк тасымалданды. Темір жол көлігімен жүк экспорты 19%, яғни 700 мың тоннаға дейін өсті. Құрылыс жүктерінің экспорты екі есеге, мұнай өнімдерінің тасымалы 11% артты. Өңірден цемент Грузияға, Қырғызстанға және Өзбекстанға шығарылады. Азық-түлік және техникалық тұздың ірі өндірушісі мен экспорттаушысының өнімдері темір жол арқылы Әзірбайжанға, Грузияға, ҚХР-ға, Ресейге жеткізіледі. Осы жылдың қаңтар-тамыз айларында 430 мың тоннадан астам тұз тасымалданса, оның ішінде экспортқа 370 мың тоннадан астамы жөнелітген.
Жүк жөнелтушілермен өткізілетін кездесулер ұзақ мерзімді әріптестікке қол жеткізуге және жүк тасымалдарын ұйымдастыру кезінде өзара іс-қимылды нығайтуға бағытталған.
Кеңесте тасымалдау процесіне қатысушылардың бірлескен күш-жігерінің арқасында тасымалдау көлемі артып келе жатқаны атап өтілді. Кездесу Қазақстан темір жолының құрылғанына 120 жыл толуына орай жүк жөнелтушілерді мерейтойлық медальмен марапаттаумен аяқталды.