Сыр елінде жалғасқан сапар

Оңтүстік өңірлерге жұмыс сапары аясында ҚТЖ басшылығы Қызылорда облысына да ат басын бұрып, Сыр елінің теміржолшыларымен кездесті. Бірқатар мекемелерді аралап, олардың жұмысымен танысқан басшылық маңызды мәселелерді талқылаған кеңес өткізіп, Мәдениет үйінде өткен салтанатты іс-шарада салаға еңбегі сіңген қызметкерлерді марапаттады.  

Облыс әкімі Нұрлыбек Нәлібаевпен кездескен «ҚТЖ» ҰК» АҚ басқарма төрағасы Нұрлан Сауранбаев Қызылорда теміржол вокзалына барып, өткен жылы жөндеуден өткен 1905 және 1969 жылдары салынған қос ғимараттың санитарлық жағдайын және аумағын абаттандыру мәселелерін талқылады.  

Одан әрі  ҚТЖ басшылары Қызылорда қалпына келтіру пойызы мекемесіне, Қызылорда локомотив пайдалану депосы мен локомотив бригадаларының демалыс үйіне, Белкөл станциясындағы «Жолаушылар тасымалы» АҚ Батыс филиалының паркіне, жекеменшік тасымалдаушы «Марал-Нұр» ЖШС ғимаратына және «Теміржолсу» мен «Қазтеміртранс» мекемелерінің өңірдегі филиалдарына барып, жұмысымен танысты. Қорытындысы бөлімше ғимаратында тораптық мекемелер басшыларының қатысуымен өткен кеңесте сөз болды. Кеңесте  компанияның Аппарат басшысы Серік Кеулімжаев, Бас инженер Рамазан Садырқұлов және Магистральдық желі дирекциясының Бас инженері Қайырбай Орынбаев аймақтағы кадрлық, қауіпсіздік және еңбек жағдайына қатысты қысқаша мағлұмат беріп өтті. Қызылорда ЖТ бөлімшесінің директоры Батырхан Базарбаев аймақ теміржолының жалпы жағдайы, қысқа дайындық, еңбек қауіпсіздігін сақтау және тағы басқа мәселелер туралы баяндады.  

– Қысқы маусымға бөлімшенің дайындығы 90 пайызды құрап отыр. Көмірмен жабдықтау 100 пайыз орындалды, жоспарланған 276 тонна көмірдің барлығы алынып, таратылды. Ғимараттар мен қазандықтардың дайындығы жасалуда, – деген  бөлімше басшысы шешімін күткен мәселелерге де тоқталды. Атап айтқанда, бөлімшеге қарасты бір жолды перегондар үлесі 54,4 пайызды құрайды, бұл оның өткізу қабілетіне кері әсер етеді. «Теміржол станциялары мен телімдерінің өткізгіштігін арттыру бойынша жоспар-іс-шараларға» сәйкес бөлімшеде бірқатар жұмыстар қолға алыныпты. Мәселен, 2026-2030 жылдары Түркістан-Қызылорда және Қызылорда-Қазалы телімдерінде екінші жолдар салу, 2025 жылы Сексеуіл станциясы жолдарын ұзарту, 2023-20230 жылдары Сексеуіл станциясында жүк қабылдап-жөнелтетін жолдары бар жаңа парк салу, келесі жылы Сексеуіл станциясындағы тақ парктің жұп алқымын қайта құрудың 2 кезеңін жүзеге асыруды қарастыруда. Бөлімше директоры осындай маңызды жоспарымен бөлісті.  

Кеңес соңында компания басшысы өңірге қатысты кейбір өзекті мәселелер бойынша тапсырмалар берді. Сонымен қатар әлі күнге санмен белгіленетін шағын бекеттерге танымал тұлғалардың есімін беру және бірқатар пойыздарға Сыр елінің ерекшелігіне қарай атау беру, аймақта көлік-логистикалық орталық құру керектігі сөз болды.  Қызылорда өңірінің тағы бір ерекшелігі – аймақ теміржолындағы 6 вокзал тарихи мәдени ескерткіштер тізіміне енген. Н.Сауранбаев сол жәдігер ғимараттардың бастапқы архитектурасын бұзбай, тарихи келбетін сақтау қажеттігін ескертті. Сонымен қатар ол ел теміржолы бойынша ең мықты жолшылар Сыр елінде екенін, сол брендті ұстап тұру – қызылордалықтарға зор жауапкершілік жүктейтінін атап өтті. Ал бөлімше басшыларына қарапайым теміржолшының еңбек жағдайын жасап, керек жабдықтарымен толық қамтамасыз етіп, жалақы мәселесіне дұрыс қарауды тапсырды. Кеңесті қорытындылай келе жалпы бөлімшенің жұмысына оң баға берді.  

Мәдениет үйінде өткен салтанатты жиында қызылордалық теміржолшыларды биылғы мерейтоймен құттықтаған компания басшысы олардың жұмысына сәттілік тіледі. 28 теміржолшыны «Қазақстан теміржолына 120 жыл» мерейтойлық төсбелгісімен және 6 адамды Құрмет грамотасымен марапаттады.