Жылу маусымына дайындық қызу жүріп жатыр

Қатал маусымда ең қажеті – жылу. Қызылордалық теміржолшылардың қыстың қақаған аязында жылы жерде жұмыс істеу үшін дайындық қызу жүріп жатыр. Ғимараттардың жылу жүйесін тексеріп, тазалау,  пештерді қажетті техникалық, тұрмыстық отын-көмірмен қамтамасыз етіп, газ қондырғыларының жай-күйіне күтім жасау жұмыстары қарқын алған.    

Қарбалас жұмыстарды Насыр Абдулла басқаратын «Теміржолсу-Қызылорда» серіктестігінің тәжірибелі жұмысшылары атқаруда. Мекеме балансындағы 8 жылу қазандығының 5-уі көгілдір отынмен, қалған 3 қазандық қатты отынмен жылытылады.

– Тұтынушылардың жылу мен суға деген қажеттілігін өтеу үшін барлық мүмкіндіктер жасалып жатыр. Жылу қазандықтары сынақтан өткізіліп, жылу құбырларының қысқа дайындығы тексерілуде. Оған қоса жылу пештеріне қажетті қатты отынға алдын ала тапсырыс беріліп, ағымдық жөндеуден өткізілген көмір сақтайтын қоймалар тексеріліп, бақылау жасалуда. Жылу маусымында мекемеге қажетті 350 тонна қатты отын-көмір сатып алу үшін «Теміржолсу» АҚ-мен келісімшарт жасалған. Қазіргі кезде мекемеде былтырғы қордан 72 тонна қалдық көмір отыны бар. Жылу жүйесінің 1,621 шақырымы қысымды жуып-шаюдан өткізілді, – дейді мекеме бастығы Насыр Абдулла.

Аудан орталықтарындағы станцияларда орналасқан 8 жылу қазандығы қыс маусымына дайындық сынағынан өткізіліп, қажет жерінде жөндеу, тазалау шаралары жасалыпты. Бұған дейін қатты отынмен жылытылып келген, кей станциялардағы жылу қазандықтарының жылыту пештері 4-5 жылдан бері көгілдір отынға біртіндеп ауыстырылды. Жаңақорған, Шиелі, Белкөл және Тереңөзек станцияларындағы жылу қазандықтары бірнеше жылдан бері көгілдір отын-газбен жылытылатындықтан экологиялық тұрғыдан тиімді деп саналады. Төретам, Жосалы, Жалағаш станциялары бойынша НЖС және ГП мекемелеріне қарасты ғимараттар автономды электрлі пештерге алмастырылып жатыр.  

Алдын ала жасалған келісімшарт негізінде жұмысшылар қысқы арнайы киімдермен де жабдықталуда. Жылу қазандықтарының операторлары біліктіліктерін арттыру үшін арнайы дайындықтан өткізілген.