Атырауда жолды күрделі жөндеу аяқталды

Биылғы жылға Атырау магистральдық желі бөлімшесіне берілген темір жолды күрделі жөндеу жоспары – 59,6 шақырым. Қазіргі уақытта оның соңғы шақырымдарын жөндеу аяқталуда.

Күрделі жөндеу жұмысы аймақта биылғы 24 наурызда Атырау жол дистанциясына қарасты Ганюшкино-Атырау учаскесінде, 15-разъезд-Аққыстау станциясы аралығында басталған болатын. Содан бері тынымсыз жұмыс жүргізген мердігер мекеме – «Интегра Констракшн» ЖШС жоспарды межелеп те қалды. Олар 26 қыркүйек күні Қызылқоға ауданы аймағындағы Жантерек-Кенбай учаскесінің 325,6- 326,9 шақырымы аралығындағы 1351 метр жолды 6 сағаттық «толаскез» алып, бес жарым сағатта уақытынан бұрын бітірді. Яғни бес сағаттан аса уақыт ішінде жол қайта ашылды. Сол секілді сенбі күні де сол учаскенің 326,9- дан 328,3-ке дейін 1350 метр жолы күрделі жөнделіп, қайта жаңарды. Екеуінде де «толаскез» күндіз 12:30 шамасында бастап, 6 сағатқа алынған.  

– Мердігерлер жұмысты шапшаң әрі сапалы жасады. Аталған участокта бұрынғы ағаш шпалдар түгел алынды. Әуелі жаңа мен ескінің түйіскен тұсы тазаланып, бұрандалары ағытылды. Алып кранмен ескі рельс шпалымен қоса қабырғасы қақырата сөгіліп, жерден көтеріліп алынды да, бос вагонға жиналды. Сосын тракторлармен рельсі алынған жол жыртылып, тегістеліп, салмақпен нығыздалып, жаңа темірбетонды шпалдар төсеуге әзірленді. Жердің негіздемесі төселіп, шебін төсеу, нығыздау, басқа да жұмыстар технологиялық талаптарға сай жасалды, – дейді Атырау жол дистанциясы, Доссор – Сағыз жол аралығы бастығының орынбасары Темірзақ Нұрбай.  

Жұмыс барысында ауыр жүктерді (темірбетонды бұрмаларды, бағаналарды, шпалдарды, ауыр техникалардың қосалқы бөлшектерін) көтеріп-түсіруге КЖ-562 маркалы краны пайдаланылып, ДУАМАТ, Унимат, ДГС, ПБР, ВПРС, т.б. машиналар да қолданылған. Жолға темірбетон шпалдар төселіп, 25 метрлік су жаңа рельстер салынған. Алдағы уақытта телімде жүк және жолаушы пойыздарының жылдамдығы артатын болады.