Еңбекқор теміржолшылар әулеті үлгі етілді
"Қазақстан теміржолшысы" газетінің Жамбыл облысындағы меншікті тілшісі
Тараз теміржол көлік және коммуникация колледжінің 1-курс студенттері үшін арнайы «Теміржолдың еңбексүйгіш әулеттері» атты кездесу ұйымдастырды.
Болашақ теміржолшылар жалпы еңбек өтілі 400 жылға жуықтаған Жаңабаевтар әулетімен кездесті.
Бүгінде үшінші буын ұрпағы теміржолда тер төгіп жүрген Жаңабаевтар – «Адал азамат – Адал еңбек – Адал табыс» қағидатын ұстанған отбасы.
– Теміржолшыға ең керек қасиет – еңбекқорлық. Онсыз бұл саланың қиындығына, үлкен жауапкершілікті қажет ететін талаптарына төзу мүмкін емес. Осыны болашақта теміржолшы болам дейтін жастарға жеткізу үшін біз жаңа оқу жылынан бастап теміржолшылар әулеттерімен, кәсіби мамандармен кездесулер ұйымдастырып отырамыз. Мұндай іс-шаралар арқылы жастарға өзінің табандылығы және қажырлы еңбегімен нәтижеге қол жеткізген адамдарды үлгі ететміз. Адамның өсіп-жетілуіне, тұлға ретінде қалыптасуына отбасындағы тәрбиенің маңызы зор. Мысалы үш буын ұрпағы осы салада еңбек етіп келе жатқан Жаңабаевтар әулетінде үш адам «Құрметті теміржолшы» атағына ие болған абыройлы отбасы, – дейді колледж директоры Ұлжан Кенжебаева.
Әулеттің атадан балаға жалғасқан еңбек жолының бастауында 45 жылын шойын жолдың бойында өткізген Ергеш Жаңабаев тұр. «Құрметті теміржолшы» атанған жанның жары Бүбісара Әбдіқұлқызы да салада 40 жыл еңбек еткен. Қос теміржолшының екі ұлы, үш қызы ата-анасының жолын жалғап, бүгінде олардың балалары да теміржолда еңбек етіп жүр. Әулеттің жалпы еңбек өтілі 380 жылды құрайды.
Колледжде өткен кездесуге Рахметжан Ергешұлы бастаған әулет мүшелері келіп, жастармен тағлымды әңгіме өрбітті. Колледж әкімшілігі қонақтарға алғысын білдіріп, лайықты сый-сияпат көрсетті.