Кәсіподақ мүшелері марапатқа ие болды
Атырау облысы бойынша меншікті тілші
Қазақстандағы Кәсіподақтар күніне орай Атырау жүк тасымалы бөлімшесінде салтанатты жиын өтіп, белсенді кәсіподақ мүшелері марапатқа ие болды.
«Қазкөліккәсіп» ҚБ Орталық кеңесінің Атырау өңірі бойынша өкілдігінің төрағасы Боранбай Қамиев көпшілікті құттықтап, арнайы баяндамасында кәсіподақтың жыл ішінде жасалған жұмыстарына тоқталып өтті. Атырау өңірі бойынша бүгінде барлығы 4453 кәсіподақ мүшесі бар. Жыл бойына көптеген мәдени-көпшілік және спорттық іс-шаралар өткізіліп, кәсіподақ мүшелерінің, зейнеткерлердің әлеуметтік, шаруашылық мәселелерін шешу жолдары, ағымдағы басқа да мәселелер қаралған.
Кәсіподақ мүшелерін бөлімше бастығы Аслан Базарғалиев те құттықтап, жұмысшы мен жұмыс беруші арасындағы дәнекер ұйымға жемісті жұмыс тіледі. Әрі қарай марапаттау салтанатына кезек берілді. ҚТЖ бойынша жылда өтетін дәстүрлі футбол чемпионатында Атырау локомотив депосының командасы 1-орын алған. Соған сәйкес, депо басшылығы мен команда мүшелері Алғыс хат және арнайы сыйлықпен марапатталды. Самарқандта өткен жарыста атыраулық желаяқтар – Г.Толыбаева, Е.Жапаров, Е.Максимов 40 команда ішінде 9 орынды иеленді. Оларға да лайықты құрмет көрсетілді. Сондай-ақ цех кәсіподақ басшылары, кәсіподақ жұмысында белсенділік танытып жүрген қызметкерлер де Құрмет грамотасы, ҚР Кәсіподақ федерациясының Алғыс хатымен, «Қазкөліккәсіп» медалімен марапатталып, ықыласқа бөленді.