Қызылордада тактикалық оқу-жаттығу өтті
Қызылорда облысы бойынша меншікті тілші
«ҚТЖ-ЖТ» серіктестігінің «Отын ресурстық орталығы» филиалына қарасты Қызылорда отын қоймасында тұтанған шартты өртті өшіру» тақырыбында тактикалық оқу-жаттығу өткізілді.
Аймақтағы төтенше жағдайға жауапты барлық мекемелердің қатысуымен өткен оқу-жаттығу жоғары деңгейде өтті деп қорытындыланды. Сексен шаршы метр аумаққа жайылған шартты өртті сөндіруге жалпы 45 минут уақыт жұмсалды. Оның ішінде 8 минутта төтенше жағдай залалсыздандырылды.
Оқу-жаттығуға қатысушылардың шапшаңдығы, ситуацияны меңгеріп, тәсіл қолдана білуі, бағдарлы әрекет жасауы, техника мен құралдарды сауатты қолдана білуі, өзге құрылымдармен бірлесе әрекет етуі қауіпсіздік талаптары толық сақталып, ережеге сай болды.
Отын ресурстық орталығындағы (ТЭК) екі жанармай резервуарының бірінен өрт шыққаны жайлы 17.00 сағатта дабыл қағылды. Орын алған төтенше жағдайдан екі бірдей оператор уланып, есінен танып құлап қалған. Қағылған дабыл бойынша оқиға орнына келген дәрігерлер тобы резервуар маңында құлап жатқандарды зембілге салып алып шығып, алғашқы көмек көрсетті.
Орталық диспетчерлік қосын шұғыл дабыл қағылған бойда тиісті органдарға хабар берді.
Қызылорда өрт сөндіру пойызының жеке құрамы 17 сағат 05 минутта оқиға орнына келіп жетіп, өрт ошағын оқшаулауға кірісті. Алдымен өртенген резервуардың жанындағы резервуарға су шашып, салқындату шаралары жасалды. Өртенген резервуарға алдымен химиялық қоспасы бар су шашып, артынан екі өрт сөндіру техникасы арқылы арнайы көбікті су шашып, өрт ошағы сөндірілді.
Оқу-жаттығу кезінде теміржолшылардың әрқайсысына бекітілген тапсырмаларды толық, сауатты әрі дәл орындауын «ӨС және АҚЖҚ» РММ бастығы азаматтық қорғау полковнигі Ә.Баякеев, Қызылорда ЖТ бөлімшесінің бас инженері Күлхан Белкібаев, «Отын ресурстық орталығы» бастығы Алмас Сыздықов, Мемлекеттік емес өртке қарсы қызмет бастығы Жетіскен Жұматов, облыстық өрт сөндірушілер, төтенше жағдайларды алдын алу мекемелерінің басшылары бақылау жасап, бағалады.
– ҚТЖ мен Төтенше жағдайлар министрлігі арасындағы жоспарлы келісімдер негізінде Қызылорда станциясында өткен тактикалық оқу-жаттығуына АЦ-5-40 маркалы арнайы 11 өрт сөндіру көлігі, Қызылорда өрт сөндіру пойызы, техникалық көліктер, жедел жәрдем секілді жалпы алғанда 16 техника, станциядағы ДС, ПЧ, ӘТЖК, ШЧ, ЭЧ, ЖІІб мекемелерінің басшылары бақылап, 112 өрт сөндіруші қатысып, тапсырма толық орындалды, – дейді Қызылорда өрт сөндіру пойызының бастығы Рысбек Шадаев.
