Жұмысшыларға жағдай жасалуда

Қозғалыс қауіпсіздігін сақтау, станциялардың өткізу қабілетін, пойыздар жүрісінің жылдамдығын арттыру үшін жол сапасы жақсы болуы шарт. Атырау магистральдық желі бойынша өткен жылы жоспар бойынша 99,97 шақырым жол күрделі жөндеуден өтті. Ал биылға 70 шақырымдай жол күрделі жөндеуге берілген болатын. Нақты айтқанда, бүгінде орындалғаны – 67, 175 км.

Ағымдағы жылы бөлімше бойынша күшейтілген орташа жөндеу мен бағыттамалы бұрмаларды ауыстыру жұмыстары да жүргізілуде. Яғни Атырау жол дистанциясы бойынша Аққыстау, Мақат, Сағыз, Мұқыр, Кенбай, Жамансор станциялары аралығында барлығы 15,276 шақырым жолды күшейтілген орташа жөндеу белгіленген. Қазіргі уақытта оның басым бөлігі жөнделіп біткен. Сондай-ақ ПЧ-9 бойынша биылға 33 жиынтық, бағыттамалы бұрма салу жоспарланып, қазіргі уақытта ст. Мақат, Рзд 377, ст. Теңдік, ст. Аққыстау, Рзд 15, Кенбай, Жамансор жолдарында 20, ПЧ-11 бойынша 4 бағыттамалы бұрма ауыстырылған.  

Қыстың қытымыр аязы мен жаздың шіліңгір ыстығында күн-түн демей далада жел өтінде жүретін теміржолшылардың еңбегі оңай емес.  

Әсіресе жолшы, пойыз құрастырушы, байланысшы, электриктер мен электромеханик, т.б. ауа-райымен санаспайтын мамандық иелеріне дамылдайтын орын аса қажет. Соған орай оларға жұмыс учаскелерінде әлеуметтік-тұрмыстық жағдай жасау «ҚТЖ» ҰК» АҚ бағдарламасында көрсетілген.  

– Былтыр өңірлерге жылыну пункттерін қайта жасақтау үшін бес тонналық 95 контейнер жеткізіліп, Атырау жол дистанциясына 50 дана, Құлсары жол дистанциясына 45 дана контейнер бөлінген болатын. Олар өңірдегі барлық станциялар мен разъездерге орналастырылып, жұмысшылар игілігіне берілді. Сонымен қатар Атырау жол дистанциясына модульді үйлер де жеткізіліп, олар Нарын, Махамбет, Қарабатан станцияларында және шағын бекеттерде орнатылды, – дейді бөлімше бастығының өндіріс жөніндегі орынбасары Аманқос Жылқыбаев.  

Инвестициялық бюджетке сәйкес биыл тағы да 14 модульді үй жеткізіліп, олар 84 жұмысшының жайлы демалуы мен жұмысына қолайлы болды. Олар Таскескен, Сазанқұрақ, 496, т.б. станция-разъездерге орнатылды. 12,5х2,70 мөлшердегі ол үйде жатын бөлме, ас дайындайтын және ішетін, жуынатын бөлме, теледидар, тоңазытқыш, жазда салқындатқыш, қыста жылыту пештері де бар. Күндіз-түні далада жүретін, кейде қонып қалатын жұмысшылар үшін бұл үйлердің көмегі зор. Ішінде барлық жағдайы бар. Ұялы байланыс та ұстап тұр. Одан бөлек 4 дана DONGFENG маркалы су жаңа вахталық және жүк автокөліктері жолшылар мен энергетиктерге берілді. Мақат қалпына келтіру пойызы да 1 жаңа бульдозер алды.