Вагон шаруашылығының артериясы

Негізі бұл бөлімді вагон шаруашылығының артериясы деуге болады. Себебі дәл осы өндірістік техникалық бөлім вагон пайдалану депосына қарасты барлық құрылымдық бөлімшелерді техникалық жабдықтармен қамтамасыз етіп отырады.

«ҚТЖ – Жүк тасымалы» ЖШС «Жамбыл ЖТ бөлімшесі» филиалының Жамбыл вагон пайдалану депосына қарасты 6 техникалық қызмет көрсету, Сарышаған, Шу, Таразда ағымдағы ағытпаны жөндеу және 2 жүк тиеуге арналған вагондарды дайындау, Шуда тежегіш жабдықты жөндеу пункттері бар. Оған аталған құрылымдардың ғимараттары мен жөндеу цехтары, вагондарға техникалық қызмет көрсететін автокөліктерін қосыңыз. Бәрі тұтас бір жүйені құрайды. Қызметі бөлек болғанымен, барлық құрылымдардың міндеті ортақ. Ол – вагондардың қауіпсіз қозғалысын қамтамасыз ету. Осы тұтас жүйеге жан беретін – депоның өндірістік техникалық бөлімі.  

– Техникалық бөлімге жыл соңында барлық пункт пен цехтар керек құрал-жабдықтарға сұраныс береді. Біз соған қарай жылдық жоспар жасап, Жамбыл бөлімшесіне тапсырыс береміз. Әрі қарай ол құжат Астанаға жіберіледі. Келген жабдықтар сұранысқа сай ма, нақтылап, қабылдап алып, орталық қоймаға жөнелтеміз. Кейін қажетінше техникалық қызмет көрсету пункттеріне таратып береміз. Ғимараттардың ағымдағы жөндеу жұмыстарына, автокөліктерге қажетті құрылғылар да ұдайы назарда. Еңбек және қозғалыс қауіпсіздігін сақтау мақсатында арнайы зерделеу жүргізіп тұрамыз. Сол үшін тиісті жоспарлы іс-шараларды ұйымдастырамыз.  

Көктемгі-күзгі байқау кезінде пункттерді аралап, не жетпей жатыр, қандай құрал-жабдыққа сұраныс берілмеді, соны саралаймыз. Тексеру кезінде дайындық жұмыстары қалай жүргізілгенін қадағалаймыз. Егер өз деңгейінде атқарылмаса, ескерту жасап, тиісті мекемелерге хат жазамыз, – дейді Жамбыл вагон пайдалану депосының өндірістік- техникалық бөлімнің бастығы Бақытжан Сыздықбаев.  

Жалпы мұнда бөлім бастығын қосқанда 4 маман жұмыс істейді. Бәрі өз ісіне маманданған, жауапкершілігі жоғары қызметкерлер. Соның арқасында өндірісте жұмыс кідіріссіз жүріп келеді. Жабдықтау қызметін дер кезінде атқарып келеді. Бөлім жұмысын 20 жыл бойы үздіксіз басқарып, тірлігінен шашау шығармай отырған Бақытжан Шымкентбайұлы жуырда «Құрметті теміржолшы» төсбелгісімен марапатталды.  

– Еңбегімді елеп, мені теміржолшылар үшін ең абыройлы саналатын марапатқа ұсынған депо, Жамбыл бөлімшесі филиалының басшыларына рахмет айтамын. Бұл – менің ғана емес, депоның жүрегі саналатын біздің бөлімнің жұмысына берілген баға, – деп ой бөлісті Бақытжан Сыздықбаев.