Толаскез: рельс бекітпелері жол машинасымен ауыстырылды

Аймақтағы магистральдық жолдардың күтімі техникалық талапқа сай болуы шарт. Қызылорда магистральдық желі бөлімшесіне қарасты Қазалы жол дистанциясының Қазалы-Бекбауыл станциясының аралығындағы тақ жолда 2 км жолдың кешенді жөндеуден өткізілуі – осы мақсатты қамтитын кезекті шара.

SMD-80 Plasser-Theurer (СМД) кешенді жол машинасымен рельс бекітпелерін жаппай ауыстыру үшін 1 қарашада 13 сағат 10 минуттан бастап 36 сағаттық толаскез берілді. Айта кетейік, СМД-80 кешенді машинасы аймақта алғаш рет қолданылуда. ПЧМ Шу мекемесінің есебіндегі СМД-80 кешенді жол машинасы еліміздегі бұл сериялы жалғыз түйір техника екен. Қызылорда магистральдық желі бөлімшесі жол бөлімінің бастығы Ахметқали Елеусінов заманауи машинаның жұмыс тиімділігіне назар аударды.

– Теміржол саласында тек Шу машиналандырылған жол дистанциясының балансындағы SMD-80 Plasser-Theurer (СМД) кешенді жол машинасы аймақ жолдарын кешенді жөндеуге алғаш рет қолданылып жатыр. Онымен жұмыс кезінде жолға төселінетін қиыршық тас айтарлықтай үнемделеді. Техника рельске бекітілген ескі шпалдарды өзі бұрап босатып алғаннан кейін жаңа шпалды өздігінен ескі шпалдың орнына салып, бекітпесін бекітетін мүмкіндікке ие. Техника жолды жөндеп өткеннен кейін жол машинасы РМ-мен тазаланған қиыршық тастардың үстінен үстеме тас төселінеді. Ал күрделі жөндеу кезінде жол төсемдері, қиыршық тас, топырақ толығымен сүріліп алынып, барлық технологиялық процестер жаңадан басталып жүргізіледі, – деп түсіндірді Ахметқали Елеусінов.  

Бұл бір қарағанда жолдарды күрделі жөндеу жұмыстары секілді көрінгенімен, СМД жол машинасының ерекшелігі заманауи сұраныстарға толық жауап бере алатын мүмкіндігінің болуында. Сонымен қатар СМД машинасымен жұмыс кезінде барлық жол жөндеу жұмыстары осы техниканың күшімен атқарылып, жол жөндеушілер технологиялық талаптардың сақталуын бақылап отырады екен.  

Толаскездің техникалық талаптарға сай өтуіне Қызылорда магистральдық желі бөлімшесі директорының орынбасары Ербол Оңғарбаев бастаған Қазалы жол дистанциясының басшылары бақылау жасады.  

Сонымен қатар аймақта жолдың бабын жасаудағы қосалқы жұмыстарға ПЧМ Ағадырдың Дуомат, ПВР, РМ, ДГС, МКТ, ПРБ секілді кешенді жол машиналары пайдаланылған. Аталған техникалармен жол төсемдері тазаланып, түзетіліп, жол қабатын тұрақтандырып тығыздау, жол төсеміндегі қиыршық тасты бөлу және тегістеу жұмыстары атқарылып, пойыздардың қозғалыс қауіпсіздігін арттыруға жіті назар аудару нәтижесінде Қызылорда магистральдық желі бөлімшесіне қарасты жол телімдерінің сапасы талапқа сай.