Ұрпақтар сабақтастығы
Түркістан облысы бойынша меншікті тілші
Шымкент станциясындағы Ғылыми-техникалық ақпарат және талдау орталығының ұйымдастыруымен жуырда екі бірдей оқу орнында студенттермен кездесу өтті.
Теміржолшылармен бірге салалық оқу орындарының ұстаздары мен шәкірттері қатысқан шара алдымен Шымкент қаласындағы М.Тынышпаев атындағы теміржол көлігі колледжінде, кейіннен Арыс қаласындағы «17 колледж» МКҚК мекемесінде өтті. Шараның мақсаты – теміржолшы мамандар легін даярлау ісіне елеулі үлес қосып келе жатқан оқу орны мен өндірістік мекемелер арасында ынтымақтастық орнатып, өзара байланысты нығайту болып табылады.
– Мұндай басқосулар жас теміржолшылар мен теміржол шаруашылығындағы өндірістік мекемелердің өзара байланысын нығайта түсетіні сөзсіз. Сонымен қатар білім алушылар арасында теория мен тәжірибені ұштастыруына зор мүмкіндіктер береді, – дейді «Жүк тасымалы» ЖШС Шымкент филиалы мекемесінің даму жоспарына сай ұйымдастырылып отырған шараға орай Ғылыми-техникалық ақпарат және талдау орталығының басшысы Ләззат Әбутәліпқызы.
Ақпараттық сағат форматында өткен жиында теміржолшы мамандығын игеріп жатқан шәкірттерге ел темір жолының даму тарихы мен бүгінгі тыныс-тіршілігі, технологиялық жетістіктері кеңінен таныстырылды. Ең басты құндылық ретінде даңқты теміржолшылардың ерен еңбегі мен жүріп өткен жолы, өмірбаяны жас буын өкілдеріне үлгі-өнеге ретінде айтылды.
